ژنێک لە کافتریاکە مۆبایلەکەی لێ وەرگیراوە و کتێب دەخوێنێتەوە
رووداو دیجیتاڵ
لە کافتریایەک لە ئەمستردام، لەگەڵ چوونە ژوورەوەت مۆبایلەکەت لێوەردەگرن. یاسای شوێنەکە بەو جۆرەیە کە دەبێت "دانیشتن بەبێ مۆبایل" بێت.
ئیلیا کنیپلهاوت لە کافتریاکە کار دەکات و دەڵێت، "یەکەم کار کە دوای هاتنەژوورەوە دەیکەن ئەوەیە مۆبایلەکانیانمان پێدەدەن. مۆبایلەکانیان لە شوێنێکی تایبەت دادەنێین. ئەمە بۆ ئەوە دەکەین کە خەڵکی دووربن لە تەکنەلۆژیا و کاتی زیاتر لەگەڵ یەکدی بەسەر ببەن."
سەردانیکاران دەبێت کاتەکانیان بە خوێندنەوەی کتێب و گفتوگۆ بەسەر ببەن.
سەردانیکارێک دەڵێت، "کارێکی قورسە. ناڵێم مۆبایل زۆر بەکاردەهێنم، بەڵام چونکە بە ئارەزووی خۆم لە ماڵەوە مۆبایلەکەم لادەبەم، بیر لەوە دەکەمەوە کە نامە بۆ کەسێک بنێرم یان نامەیەکم بۆ هاتبێت."
رۆژانە هۆڵەندییەکان دوو کاژێر و 22 خولەک مۆبایل بەکاردەهێنن، لەکاتێکدا پێرار تەنیا کاژێرێک و 47 خولەک مۆبایلیان بەکاردەهێنا. بە گوێرەی میدیای هۆڵەندا، ساڵی 2013، 37٪ـی هۆڵەندییەکان رۆژانە کتێبیان دەخوێندەوە، بەڵام ئێستا 33٪یان.
هاووڵاتییەکی دیکە دەڵێت، "لە ماڵەوەش هەندێکجار مۆبایلەکانمان لادەبەین، بەڵام سوودی نییە و ناتوانم لەسەری بەردەوام بم."
بە گوێرەی پەیمانگای پەروەردەیی کومۆن کە بارەگاکەی لە ژاپۆنە، مرۆڤایەتی ئێستا بەراورد بە رابردوو کەمتر دەخوێنێتەوە و هۆکاری سەرەکیش زیاد بەکارهێنانی تەکنەلۆژیایە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ