رووداو دیجیتاڵ
شەپۆلێکی بارانبارین بووە هۆی دروستبوونی لافاو لە کۆماری کۆنگۆی دیموکرات و بەو هۆیەوە زیاتر لە 100 کەس گیانیان لەدەستدا.
بە گوتەی بەرپرسانی کۆماری کۆنگۆی دیموکرات، شەپۆلێکی بارانبارین بەشێکی زۆری وڵاتەکەی گرتوەتەوە و ئەوەش بووەتە هۆی دروستبوونی لافاو و لە ئەنجامیشدا تەنیا لە هەرێمی کیڤوی باشووری وڵاتەکە زیاتر لە 100 کەس گیانیان لەدەستداوە.
بارانبارین دوای نیوەڕۆی رۆژی پێنجشەممە 4-5-2023 ئەو وڵاتەی گرتەوە و هەر زوو گۆڕدرا بۆ بارانی بەخوڕ؛ ئەوەش بووە هۆی دروستبوونی لافاو و بەرزبوونەوەی ئاستی ئاوی رووبارەکان.
بەرپرسانی ئەو وڵاتە ئاماژە بەوە دەکەن، تەقینی ئاوی رووبارەکان و دروستبوونی لافاوەکە وایکردووە، ئاو ژمارەیەکی زۆر هاووڵاتی ببات.
ئەم بارانبارینە بەخوڕە و مردنی ئەو هەموو خەڵکە دوای ئەوە هات، لە رۆژانی رابردوودا شەپۆلێکی بارانبارین وڵاتی رواندای دراوسێی کۆماری کۆنگۆی دیموکراتی گرتەوە و لەوێش لافاو دروستبوو و بەو هۆیەوەش لانیکەم 127 کەس گیانیان لەدەستدا.
کۆماری کۆنگۆی دیموکرات، وڵاتێکە لە نێوەڕاستی ئەفریقا و دووەمین وڵاتی ئەو کیشوەرەیە لە رووی رووبەرەوە دوای جەزائیر؛ ژمارەی دانیشتووانەکەی نزیکەی 112 ملیۆن کەسە و لە رووی سەرچاوەی سرووشتییەوە دەوڵەمەندە، بەڵام ناسەقامگیریی سیاسی، نەبوونی ژێرخان، هەبوونی گەندەڵی بوونەتە هۆی ئەوەی ئەو وڵاتە پێشکەوتنێکی ئەوتۆ لە زۆربەی بوارەکاندا بەدەست نەهێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ