ئەمریکا 20 ملیار دۆلار بۆ پڕۆژەکانی وزەی پاک تەرخان دەکات

 

رۆژی پێنجشەممە، 4-4-2024، کامالا هاریس، جێگری سەرۆکی ئەمریکا و میشێل رێگان، سەرۆکی دەزگای پارستنی ژینگەی وڵاتەکە هەشت رێکخراویان راگەیاند کە چاودێریی خەرجکردنی 20 ملیار دۆلار لە بواری وزەی پاک دەکەن.

 

پارەکە دەیان هەزار پڕۆژەی وزەی پاک و گواستنەوە دەگرێتەوە و لەو ناوچانەی ئەمریکا جێبەجێ دەکرێن کە لە پڕۆژەکانی وزەی پاک سوودمەند نەبوون.

 

ئەو 20 ملیار دۆلارە لە رێگەی سندووقی کەمکردنەوەی گازە زیانبەخشەکانەوە تەرخان دەکرێت کە لە چوارچێوەی یاسای کەمکردنەوەی هەڵاوسان لە ساڵی 2022ـدا دروستکراوە.

 

رێکخراوە هەڵبژێردراوەکان تۆڕێکی پارەدارکردنی نیشتمانی پێکدەهێنن کە هاوکار دەبن لە دەستپێکردنی پڕۆژەکان لە 7 ساڵی داهاتوودا.

 

پێشبینی دەکرێت بە جێبەجێکردنی پڕۆژەکان، ساڵانە دەردانی 40 ملیۆن تۆن گازی ژەهراوی کەمببێتەوە.

 

کامالا هاریس لە راگەیێندراوێکدا دەڵێت، "ئەو گەرەنتییانەی ئەمڕۆ راگەیێندراون، زامنی ئەوە دەکەن کە خێزانەکان و ناوەندە بازرگانییە بچووکەکان دەستیان بە سەرمایەی پێویست دەگات تاوەکو پڕۆژەکانی وزەی پاک و کەشوهەوا لە ناوچەکانیان بکەنە راستی".

 

لەو 20 ملیار دۆلارەی تەرخانکراوە، لانیکەم 4 ملیار دۆلار بۆ وەبەرهێنان لە ناوچە گوندنشینەکان تەرخان دەکرێت.