دۆناڵد ترەمپ، سەرۆکی پێشووی ئەمریکا. وێنە: AFP
رووداو دیجیتاڵ
دوای ئەوەی لە دادگەی مانهاتن لە نیویۆرک، ترەمپ لە بەرامبەر 34 تۆمەتی جیاواز کە درابوونە پاڵی بێتاوانی خۆی راگەیاند، گەڕایەوە فلۆریدا و گوتارێکی پێشکێشی لایەنگرانی کرد کە پێشوازییان لێکرد.
رۆژی سێشەممە 4-4-2023، کاژێر 8:30 خولەک بەکاتی ویلایەتی فلۆریدا لە ئەمریکا [کاژێر 3:20 خولەکی سەرلەبەیانی بەکاتی هەولێر]، دۆناڵد ترەمپ، سەرۆکی پێشووی ئەمریکا گەڕایەوە ماڵەکەی خۆی لە شارۆچکەی پاڵم بیچ لە فلۆریدا و گوتارێکی پێشکێشکرد.
دۆناڵد ترەمپ گوتی، "تەنیا تاوان ئەنجاممداوە ئەوە بووە بەبێ ترس بەرگری لە نەتەوەکەمان بکەم لە دەست ئەوانەی دەیانەوێت لەنێویی بەرن." گوتیشی، "هەرگیز بیرم لە شتێکی هاوشێوە نەدەکردەوە بەسەر ئەمریکادا بێت، هەرگیز نەمدەزانی ئەمە روودەدات."
رۆژی سێشەممە، دۆناڵد ترەمپ گەیشتە دادگەی مانهاتن لە نیویۆرکی ئەمریکا. لەوێ خرایە ژێر چاودێری پۆلیسەوە و پەنجەمۆری پێکرا و وێنەشی گیرا، بەوەش بوو بە یەکەم سەرۆکی ئەمریکا لە تەواوی مێژووی وڵاتەکەدا دەستگیربکرێت.
دۆناڵد ترەمپ لەپێشترین بەربژێری پارتی کۆمارییەکانە بۆ هەڵبژاردنی سەرۆکایەتیی تشرینی دووەمی 2024ی ئەمریکا. باس لەوە دەکات، رەوتێکی پەڕگیری چەپ هەن دەیانەوێت رێگە لە بوونەوە بە سەرۆکی بگرن بە هەر نرخێک بێت.
ئالڤین براگ، داواکاری گشتیی دادگەی مانهاتنی نیویۆرک بە تۆمەتی ساختەکردنی تۆماری بازرگانی بۆ شاردنەوەی زانیاریی زیانبەخش لە هەڵبژاردنی سەرۆکایەتیی ساڵی 2016دا بڕیاری دەستگیرکردنی بۆ دۆناڵد ترەمپ دەرکرد.
ئەو تۆمەتانەی دەدرێنە پاڵ دۆناڵد ترەمپ بریتین لە پێدانی 130 هەزار دۆلار بە ستۆرمی دانیێڵس، ئەکتەری پێشووی فیلمە رووتەکان و پێدانی 150 هەزار دۆلار بە کارن مەکدۆگاڵ، ئەکتەری پلەی بۆی تاوەکو زانیاری لەبارەی ئەو پەیوەندییە سێکسییەوە بڵاونەکەنەوە لەگەڵ ترەمپدا هەیانبووە.
دۆناڵد ترەمپ لە دادگەی نیویۆرک بێ تاوانی خۆی بە دادوەر راگەیاند.
لە گوتارەکەیدا دۆناڵد ترەمپ رایگەیاند: کەیسەکە ساختە بووە و تەنیا بۆ بەربەستدانان لە بانگەشەکردنی ترەمپ بۆ هەڵبژاردنی 2024ی ئەمریکا کراوە. گوتیشی، "پێویستە بە زووترین کات دابخرێت."
"خراپی سیاسەتی ئیدارەی بایدن"
دۆناڵد ترەمپ لە گوتارەکەیدا بە تووندی رەخنەی لە سیاسەتی ئیدارەی بایدن گرت و لە بەشێکی قسەکانیدا، کشانەوەی سوپای ئەمریکای لە ئەفغانستان بە "شەرمەزارترین کات لە مێژووی ئەمریکا" ناوبرد.
سیاسەتی ئیدارەی بایدن، وەک ئەوەی دۆناڵد ترەمپ دەڵێت، "خەریکە سەر بۆ هەڵگیرسانی جەنگی جیهانیی سێیەم دەکێشێت، ئەویش بەهۆی ئەو ژمارەی زۆرەی وڵات ئێستا مامەڵە لەگەڵ چەکی ئەتۆمیدا دەکەن." ترەمپ گوتی، "ئێمە زۆر لە [جەنگی جیهانیی سێیەمەوە] دوور نین، بڕوا دەکەن یان نا."
لە مێژووی 60 ساڵی رابردووی ئەمریکادا، بەگوتەی ترەمپ "هەڵاوسان هێندەی کاتی ئیدارەی بایدن بەرزنەبووەتەوە، بەڵام لەجیاتی هەوڵدان بۆ چارەسەرکردنی ئەو کێشەیە، دەیانەوێت 45ـەمین سەرۆکی ئەمریکا دەستگیربکەن کە 75 ملیۆن دەنگی هێناوە. ئەو ژمارەیەش لە دەنگی تەواوی سەرۆکەکانی ئەمریکا لە مێژوودا زیاترە."
دۆناڵد ترەمپ ئاماژەی بەوەشکرد، "سیستەمی دادوەریی ئەمریکا بێ یاساییە." تۆمەتی ئەوەی دایە پاڵ پارتی دیموکراتەکان کە "هەموو شتێک بۆ بردنەوەی هەڵبژاردنەکان دەکەن."
دۆناڵد ترەمپ بە شێوەیەکی تووند رەخنەی لە جۆ بایدن، سەرۆکی ئەمریکا گرت و گوتی، "ئەگەر پێنج خراپترین سەرۆکی پێشووی ئەمریکا ریز بکەیت بە دوای یەکدا حوکمڕانی بکەن، هێشتا ئەو وێرانکارییە بەسەر ئەمریکادا ناهێنن کە بایدن هێناویەتی."
لە کۆتایی گوتارەکەیدا دۆناڵد ترەمپ گوتی، "لەگەڵ هەموو ئەوەی گوتم و لەگەڵ ئەو هەورە رەشەی بەسەر وڵاتە خۆشەویستەکەمانەوە هەیە، هیچ گومانێکم نییە کە دووبارە ئەمریکا گەورە دەکەینەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ