کاردانەوەی سەردانی پاپا فرانسیس لە میدیا جیهانییەکان

 

وێڕای مەترسییەکانی کۆرۆنا و بارودۆخی ئێستای عێراق، پاپا سوور بوو لەسەر سەردانەکەی. ئەو هۆکارانە وایکردووە کە میدیا جیهانییەکان بە گەرموگوڕییەوە باس لە سەردانی 266ـەمین پاپای ڤاتیکان بکەن. 

 

رۆژنامەی نیویۆرک تایمزی ئەمریکی لەژێر ناونیشانی "پاپا دەست بە گەشتێکی پڕ لە هێما و مەترسی بۆ عێراق دەکات" دەنووسێت، "بە هەڵبژاردنی عێراق وەکو یەکەم شوێن بۆ سەردانەکەی دوای دەستپێکردنی کۆرۆنا، فرانسیس راستەوخۆ خۆی کرد بە نێو پرسەکانی ئاشتی شەڕ و هەژاری و ناکۆکییە ئایینییەکان لە خاکێکی پیرۆزی دێریندا."

 

هاوکات رۆژنامەی واشنتن پۆستی ئەمریکی لەبارەی کات و شوێنی سەردانەکەی پاپا دەڵێت، "بە بڕیاردان لەسەر گەشتکردن، سەرەڕای مەترسییەکان، بۆ وڵاتێک کە زیاتر لە هەموو شتێک بە شەڕ و ئازارچەشتن بەناوبانگە، فرانسیس هەندێ لەو تایبەتمەندییانەی خۆی لێکداوەتەوە کە ساڵانی پێشوو وایانکردبوو پاپایەتییەکەی وەکو شتێکی نوێ دەربکەوێت".

 

لە بەشێکی دیکەی راپۆرتەکەی واشنتن پۆستدا هاتووە: "پاپا فرانسیس لە کاتێکدا گەشت دەکات کە کەسایەتییە جیهانییەکانی دیکە لە شوێنی خۆیان وەستاون، [پاپا فرانسیس] مەبەستیەتی رۆڵێک لە ئاوەدانکردنەوەی وڵاتێکدا بگێڕێت کە چەندین دەیەیە ئەو هەوڵانە شکستیان هێناوە. سەردانەکەی بە پێشاندانی بوێری هەژماردەکرێت بۆ وڵاتێک کە هەوڵدەدات خۆی لە شوێنەواری داگیرکاریی ئەمریکا و دڕندایەتیی داعش رزگاربکات، کە داعش گرووپێک بوو هەڕەشەی داگیرکردنی رۆمای دەکرد."

 

رۆژنامەی دەیلی تەلەگرافی بەریتانی دەنوسێت: "پاپا دەیەوێت بە سەردانە مێژووییەکەی بۆ عێراق کۆتایی بە تووندوتیژی بهێنێت."

 

لە لایەکی دیکەوە رۆژنامەی دەیلی سەباحی تورکی لەبارەی سەردانەکەی پاپا دەڵێت، "بۆ پاپا کە هەندێکجار سەردانی ئەو شوێنانە دەکات کریستیانەکان وەکو پێکهاتەیەکی کەم ژمارەی چەوسێندراو تێیدا دەژین، کریستیانە گەمارۆدراوەکانی عێراق ئەو نموونەیەی 'شەهیدانی کەنیسەن' کە [پاپا فرانسیس] لە تەمەنی گەنجێتییەوە خۆشی ویستوون."

 

رۆژنامەی گاردیانی بەریتانی لەژێر ناونیشانی "پاپا فرانسیس دەگاتە بەغدا بۆ گەشتێکی سەرکێشانەی مێژوویی لە عێراق" باس لە مەترسیە ئەمنی و تەندروستییەکانی گەشتەکەی پاپا بۆ عێراق دەکات. 

 

دۆچەڤیلەی ئەڵمانی لە ماڵپەڕی خۆی بڵاویکردووەتەوە "ئیبراهیم لە عێراق لەدایکبوو، هەر لەوێش بە گوێرەی ئینجیل، نەهەنگ [پێغەمبەر] یونسی قووتدا. پاپا فرانسیس سەردانی ناوچەیەک دەکات کە لە مێژوویەکی پیرۆزدا نوقمبووە."

 

رۆژی هەینی پاپا فرانسیس، پاپای ڤاتیکان لە رۆمای ئیتاڵیاوە بە فڕۆکەیەک بەرەو عێراق کەوتەڕێ و کاژێر 02:00ـی دوانیوەڕۆ لە فڕۆکەخانەی نێودەوڵەتیی بەغدا نیشتەوە. لەلایەن مستەفا کازمی، سەرۆکوەزیرانی عێراق بە رێوڕەسمێکی تایبەت پێشوازی لێکرا. 

 

دوای کۆبوونەوەکەی لەگەڵ کازمی، پاپا فرانسیس بەرەو کۆشکی سەرۆکایەتی لە بەغدا بەڕێکەوت و لە رێوڕەسمێکدا لەلایەن بەرهەم ساڵح، سەرۆککۆماری عێراق پێشوازی لێکرا. هاوکات لە نووسینگەی تایبەتی سەرۆککۆماری عێراق لەگەڵ بەرهەم ساڵح کۆبووەوە. 

 

هەر لە کۆشکی سەرۆکایەتی لە بەغدا، لە هۆڵی کۆبوونەوەکان، پاپا فرانسیس لەگەڵ بەرپرسانی باڵای عێراق، دیپلۆماتکار و رێکخراوەکانی کۆمەڵگەی مەدەنی کۆبووەوە و گوتارێکی پێشکێشکرد. باسی گەندەڵی و بنبڕکردنی چەک و کوردانی ئێزدی کرد. گوتی ئەو پەیامی ئاشتی لەگەڵ خۆی هێناوە بۆ عێراق.

 

هەر ئەمڕۆ هەینی پاپا فرانسیس سەردانی کەنیسەی سەیدە ئەلنەجاتی کرد و لەوێش گوتارێکی پێشکێشکرد. 

 

6ـی ئاداریش کە دەکاتە رۆژی شەممە، پاپا فرانسیس سەردانی نەجەف دەکات، دواتر دەچێتە ئور و پاشان دەگەڕێتەوە بەغدا. لەکاتی چوونی بۆ نەجەف، لەگەڵ ئایەتوڵلا سیستانی، مەرجەعی باڵای شیعەکانی عێراق کۆدەبێتەوە.

 

پاشان بە فڕۆکە لە نەجەفەوە بەرەو ناسرییە بەڕێدەکەوێت و لەوێشەوە دەچێتە شاری ئور. هاوکات دوای نیوەڕۆکەی دەگەڕێتەوە بەغدا و لە کەنیسەی قەشە جۆزێف نزا و نوێژی بە کۆمەڵ دەکات.

 

رۆژی 7ی ئادار، پاپا فرانسیس بەیانییەکەی لە بەغداوە بەرەو هەولێر بەڕێدەکەوێت. لە فڕۆکەخانەی نێودەوڵەتیی هەولێر لە رێوڕەسمێکدا لەلایەن نێچیرڤان بارزانی، سەرۆکی هەرێمی کوردستان پێشوازی لێدەکرێت و هەر لەوێ لەگەڵ سەرۆکی هەرێمی کوردستان کۆدەبێتەوە.

 

لە فڕۆکەخانەی نێودەوڵەتیی هەولێر لەگەڵ پیاوانی ئایینی و ئەندامانی رێکخراوەکانی کۆمەڵگەی مەدەنی کۆدەبێتەوە. دواتر لەگەڵ مەسرور بارزانی، سەرۆکوەزیرانی هەرێمی کوردستان کۆدەبێتەوە. بەپێی ئەو خشتەیەی کە دانراوە، کۆبوونەوەی پاپا فرانسیس و مەسرور بارزانیش لە فڕۆکەخانەی نێودەوڵەتیی هەولێر دەبێت.

 

دواتر پاپا فرانسیس بە هێلیکۆپتەر بەرەو موسڵ بەڕێدەکەوێت و لە دوای گەیشتنی نزا بۆ قوربانیانی جەنگ لە مەیدانی کەنیسە (حوش البیعة)دا دەکات.

 

لە موسڵ بە هێلیکۆپتەر دەچێتە قەرەقۆش لەگەڵ پێکهاتەی کریستیانەکان لە کەنیسەی (تاهیرە) لە قەرەقۆش کۆدەبێتەوە.

 

دواتر دەگەڕێتەوە هەولێر و دوای نیوەڕۆکەی لە یاریگەی نێودەوڵەتیی فرەنسۆ هەریری نزای بە کۆمەڵ دەکرێت و پاپا فرانسیس گوتارێک پێشکێش دەکات. دوای رێوڕەسمەکەی یاریگە لە رێگەی فڕۆکەخانەی نێودەوڵەتی هەولێر دەگەڕێتەوە بەغدا.

 

بەیانیی رۆژی 8ی ئادار، پاپا فرانسیس لە فڕۆکەخانەی نێودەوڵەتیی بەغدا لە رێوڕەسمێکی تایبەتدا بەرەو رۆما بەڕێدەکەوێت و دەگەڕێتەوە ڤاتیکان.