ژمارەی کۆچبەران لەسەر سنووری نێوان ئەمریکا و مەکسیک بەشێوەیەکی بەرچاو زیادیکردووە
رووداو دیجیتاڵ
لە شارۆچکەی هیوکستلا لە باشووری مەکسیک، کۆچبەران ریزیان بەستووە بۆ ئەوەی لێویان بدوورنەوە و مان لە خواردن بگرن تاوەکو داواکارییەکەیان جێبەجێ دەکرێت و سنوورەکانیان بۆ دەکرێتەوە.
ئەو کۆچبەرانە داواکارن لە بەرپرسانی مەکسیک، رێگەیان بدەن بەرەو سنوورەکانی ئەمریکا بڕۆن.
جۆزێ لویس، کۆچبەری دۆمەنیکیە و دەڵێت، "من، زیندانیکراوێکی ئازادم، لەبەرئەوەی ناتوانم بچمە ئەو شوێنەی خۆم دەمەوێت؛ هەموو رێگاکانمان لێ گیراون و لە دۆخێکی خراپداین."
لەو شارۆچکەیەدا، زیاتر لە سێ هەزار و 500 کۆچبەر هەن، کە خەڵکی وڵاتانی کوبا، سلڤادۆر، گواتیمالا، هاییتی، هندۆراس و ڤەنزوێلان. مەکسیک وێستگەیەکی سەرەکیی ئەو کۆچبەرانەیە کە دەیانەوێت بە رێگەی نایاسایی خۆیان بگەیێننە ئەمریکا.
ژمارەی کۆچبەران لەسەر سنووری نێوان ئەمریکا و مەکسیک بەشێوەیەکی بەرچاو زیادیکردووە، بەجۆرێک لە چەند هەفتەی رابردووەوە، زیاتر لە 10 هەزار کۆچبەر لەسەر ئەو سنوورە کۆبوونەتەوە و دەیانەوێت لە دەرفەتێکدا خۆیان بگەیێننە ئەمریکا.
ئیرینۆ موجیکا، چالاکوانی بواری کۆچبەرانە و دەڵێ بەڵێن دەدات بەردەوام بێت لە هەوڵەکانی تاوەکو رێگەکەیان بۆ دەکرێتەوە.
ئەو چالاکوانە هەروەها دەڵێ "ئێمە یەکگرتووین و بەردەوامیش دەبین لەوەی شەڕی حکومەت بکەین تاوەکو دۆخەکە لە بەرژەوەندیی ئێمەدا کۆتایی دێت و رێگەمان بۆ دەکرێتەوە. ئەوەی حکومەتی مەکسیک دەیکات تاوانە".
بەگوێرەی ئامارەکانی حکومەتی مەکسیک، لە مانگی رابردووەوە رۆژانە نزیکەی 10 هەزار کۆچبەر گەیشتوونەتە سنووری نێوان ئەمریکا و مەکسیک و، هەوڵیانداوە خۆیان بگەیێننە ئەمریکا، بەرپرسانی ئەمریکاش گوشار لەسەر مەکسیک دەکەن بۆ ئەوەی رێگەنەدات کۆچبەران بەئاسانی بگەنە سنوور و لەوێوەش بپەڕنەوە بۆ وڵاتەکەیان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ