زیاتر لە هەزار منداڵ و مێرمنداڵ لە غەززە بەشداری لە کەرنەڤاڵێکی مەلەکردندا دەکەن

 

وائیل حەمەدۆنە، بەڕێوەبەری ئەکادیمیای تەنتیش بۆ فێرکردن و راهێنانی مەلەکردن دەڵێت، "کەرنەڤاڵی غەززەمان بۆ مەلەکردن راگەیاندووە. پێشبڕکێیەکی فراوان بەڕێوەدەبەین بۆ دەرچووانی ئەکادیمیای تەنتیش بۆ منداڵان، ئەوەش بە مەبەستی فێرکردن و راهێنانی مەلەکردن کە لە چوارچێوەی مەشق و راهێنانی مەلەکردن بۆ ساڵانی 2021-2022 کردوومانە. لەم کەرنەڤاڵەدا زیاتر لە هەزار منداڵ بەشدارن و پێشبڕکێی مەلەکردن لە شوێنە قووڵەکان و خێرایی مەلەکردن دەکرێت." 

 

دەریا، ‌تاکە دەرچەی هەناسەدانی دانیشتووانی کەرتی غەززەیە، ئەوەش هۆکاری سەرەکیی بایەخدانی منداڵان و خەڵکی ئەو ناوچەیەیە بۆ مەلەکردن. ئەو وەرزشە بۆ دانیشتووانی غەززە کات بەسەربردن و کێبڕکێ و فێربوونە کە بەهۆیەوە بەشداری لە کێبڕکێ ناوخۆیی و نێودەوڵەتییەکان دەکەن.  

 

محەممە شافعی، بەشداربووی کەرنەڤاڵەکە گوتی، "بەرلەوەی فێری مەلەکردن بم، لە چوونە ناو ئاو زۆر دەترسام، بەڵام دوای خۆتۆمارکردنم لە ئەکادیمیای تایبەت بە فێربوونی مەلەکردن، بە باشترین شێوە مەلە دەکەم و ناترسم و بۆ ماوەیەکی دوور و درێژ مەلە دەکەم." 

 

یەحیا حەماد، بەشداربووی کەرنەڤاڵ باسی لەوە کرد، "فێری مەلەکردن بووم، خۆم لەگەڵ کەشەکە گونجاند و پەرەم بە توانای خۆم دا و بە پاڵپشتیی کەسوکارم کە رۆڵێکی بەرچاویان هەبوو، ئێستا یەکێکم لە مەلەزانە هەرە باشەکان." 

 

دەیان راهێنەر و رزگارکەر رۆڵی کارایان هەبوو لە سەرخستنی پێشبڕکێیەکە کە ئامانج لێی نەهێشتنی کاریگەرییە خراپە دەروونییەکان بووە کە بەهۆی شەڕ و لێکەوتەکانییەوە کاریگەریی خستووەتە سەر دەروونی منداڵان و مێرمنداڵەکان. 

 

ئوسامە بەسیونی، قوتابی پۆڵی دەیەم و بەشداربووی کەرنەڤاڵەکە ئاماژەی بەوە کرد، "لە سەرەتای دەستپێکردنم بۆ فێربوونی مەلەکردن زۆر دەترسام و هەوڵم دەدا دەست بەهەر شتێکەوە بگرم بۆ ئەوەی نەخنکێم. دواتر بەسەر ترسەکەمدا زاڵبووم و تەکنیکی نوێ فێربووم و پشتیوان بە خودا ئێستا لە ئاستێکی باشدام و مەلەکردن ئیدی بووەتە وەرزشی دڵخوازم." 

 

لینە رەزیعە، دایکی یەکێک لە بەشداربووان و دەڵێت، "بەدڵنیاییەوە کچەکەم ئەمڕۆ زۆر دڵخۆشە بەهۆی بەشداریکردنی لەم کەرنەڤاڵە. پشتیوان بە خودا لە داهاتوودا دەبێتە راهێنەرێکی زۆر باش. لە تەمەنێکی بچووکەوە کچەکەم حەزی بە مەلەکردن بوو، بە هاندانی هاوڕێیەکانیشی ئەمڕۆ یەکێکە لە باشترینەکان." 

 

بەردەوامبوونی گەمارۆ لەسەر کەرتی غەززە وایکردووە مەلەکردنیش وەک وەرزشەکانی دیکە تووشی ئاڵنگاریی کەمیی خزمەتگوزاری ببێتەوە لە کەرەستە و دابینکردنی شوێن و مەلەوانگە.