دیمەنی ژمارەیەک کۆچبەر لەناو کەنیسەیەک
رووداو دیجیتاڵ
ئەڵمانیا ئەو کۆچبەرانە دیپۆرت دەکاتەوە کە پەنایان بردووەتە بەر کەنیسەکان. ئەم هەفتەیە یەکەمین کۆچبەر لە هامبۆرگ دیپۆرت کرایە سوێد.
لە ئەڵمانیا کەنیسە کاسۆلیکی و پرۆتێستانتییەکان نیگەرانن؛ پارتەکانی چەپ و سەوزەکان و بەشێکی شەقامی ئەڵمانیاش نیگەرانن، نیگەرانییەکەش لەوەیە کە ئەم هەفتەیە پۆلیسی ئەڵمانی کۆچبەرێکی تەمەن 29 ساڵی لە کەنیسەیەک دەرهێناوە و دیپۆرتی سوێدی کردووەتەوە.
کەنیسەکان دەڵێن، ئەو کۆچبەرە زۆر نەخۆش بووە و لەسەر ئەو بنەمایەش کەنیسەیەک لە شاری هامبۆرگی ئەڵمانیا پەنای دابوو؛ ئەویش دوای ئەوەی داوای پەنابەرییەکەی لە ئەڵمانیا رەتکراوەتەوە و بڕیار دراوە دیپۆرتی سوێد بکرێتەوە، چونکە پێشتر لەوێش داوای مافی پەنابەریی کردبوو و پەنجەمۆری هەبووە.
لە ئەڵمانیا کەنیسەکان و دامەزراوە ئایینییە جووەکان مافی ئەوەیان هەیە لەسەر بنەمای مرۆیی بۆ ماوەیەکی کاتی ئەو کۆچبەرانە داڵدە بدەن، کە دۆسیەکانیان دادەخرێت و دەبێت ئەڵمانیا بەجێبهێڵن.
لە هەندێک وڵاتی دیکەی ئەورووپاش رێککەوتنی هاوشێوە لەنێوان دامەزراوە ئایینییەکان و دەوڵەتدا هەن، بەڵام هیچیان هێندەی ئەڵمانیا باوەشیان بۆ کۆچبەران نەکردووەتەوە.
حکومەتی ئەڵمانیا دەڵێت، کاتێک پۆلیس چووە کۆچبەرەکەی لە کەنیسەکە دەرهێناوە، بە لەسەرخۆیی هاوکاریی پۆلیسی کردووە و هیچ تووندوتیژییەک رووینەداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ