ئاڵای سوێد لەسەر باڵەخانەیەک لە شارێکی ئەو وڵاتە
رووداو دیجیتاڵ
فەرمانگەیەکی چاودێریی دەوڵەت لە سوێد رەخنە لە فەرمانگەی کۆچبەرانی وڵاتەکەی دەگرێت و دەڵێت، خەڵک هەیە چوار ساڵە داوای وڵاتینامەی کردووە، هێشتا وەڵامی نەدراوەتەوە؛ هەروەها زۆرجار بڕیاری راست لەسەر داواکارییەکان نادرێن.
فەرمانگەی وردبینیی سوێد، کە دامەزراوەی باڵای چاودێریکردنی دامەزراوەکانی دەوڵەتە و لە کارایی و تەندروستیی کاری ئەو دامەزراوانە دەپێچێتەوە، ئەم ماوەیە چاودێریی فەرمانگەی کۆچبەرانی وڵاتەکەی کردووە. لە راپۆرتی فەرمانگەکەدا هاتووە، فەرمانگەی کۆچبەران یەکجار خاو و ناکاران لە وەڵامدانەوەی ئەوانەی داوای وڵاتینامە (یان پاسپۆرتی سوێدی) دەکەن.
فەرمانگەکە نموونەی بەوە هێناوەتەوە، خەڵک هەیە چوار ساڵە داوای وڵاتینامەی کردووە و هێشتا وەڵامی نەدراوەتەوە، هۆیەکەشی ئەوەیە کە فەرمانگەی کۆچبەران زۆرتر کار لەسەر ئەو کەیسانە دەکات وەڵامدانەوەیان ئاسانە، ئەوانەی پێویستیان بە لێکۆڵینەوەی زۆرتر بێت بۆ ماوەی دوور و درێژ دوادەخرێن؛ ئەمەش وایکردووە کەسانی داواکار بۆ ماوەی دوور و درێژ لە چاوەڕوانیدا بمێنن.
دامەزراوەکە داوا لە حکومەتی سوێد دەکات رێوشوێن بگرێتەبەر و نەهێڵێت چیدیکە ئەو دواکەوتنە بەردەوام بێت. هەروەها لەڕووی یاساییەوە ئاسانکاری بۆ فەرمانگەی کۆچبەران بکرێت کە خێراتر زانیاری لەسەر کەسی داواکار دەستکەوێت و بەو هۆیەوە بتوانێت زووتر بڕیار بدات.
هاوکات داوای ئەوەش کراوە، سیستمێکی باشتری کۆنترۆڵکردنی کاری نێو فەرمانگەکە دابنێت بۆئەوەی هەمووان وەکو یەک کار بکەن و بڕیاری هەڵەش نەدرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ