رووسیا: کەسێکمان سزادا کە ویستی سیخوڕی بۆ ئەڵمانیا بکات

 

رۆژی پێنجشەممە، 04-04-2024، دادگەی هەرێمی ئۆمسک لە باشووری رۆژئاوای سایبیریا رایگەیاند پیاوێکی 46 ساڵەیان دەستگیرکردووە و بە 12 ساڵ بەندکردن سزای داوە بەهۆی ئەوەی ویستوویەتی لە بەرامبەر چوونی بۆ ئەڵمانیا سیخوڕیی بۆ وڵاتەکە بکات.

 

دادگەکە دەڵێت: "ئەو پیاوە ویستوویەتی پەیوەندیی بە بەرپرسێکی ئەڵمانییەوە بکات."

 

بەگوێرەی دادگەی ئۆمسک، هێزە ئەمنییەکانی رووسیا لە تەمووزی 2023 پیاوەکەیان دەستگیرکرد و دەستیان بەسەر فلاش میمۆرییەک گرت کە کۆدی نەخشەی (لۆکەیشنی) چەند بنکە و یەکەیەکی سەربازیی رووسیای تێدابوو.

 

بەگوێرەی یاسای سزاکانی رووسیا، ناپاکی لە نیشتمان بە بەندکردنی تاهەتایە سزادەدرێت، چەند گرووپێکی داکۆکیکردن لە مافی مرۆڤ دەڵێن: "رووسیا ئەو سزایە بەسەر لایەنە ئۆپۆزیسیۆنەکان و رەخنەگرەکاندا دەسەپێنێت."

 

سزا و تۆمەتەکانی سیخوڕی و ناپاکی لە نیشتمان لەدوای هەڵگیرسانی جەنگی ئۆکراینا لە شوباتی 2022 تووندتر و زۆرتر بوونە لە رووسیا.

 

یەکێک لە رەخنەگرە بەنێوبانگەکانی رووسیا ئەلێکسی ناڤالنی بوو کە مردنی لە شوباتی ئەم ساڵدا لە زیندان مشتومڕێکی زۆری بەدوای خۆیدا هێنا و زۆر لە وڵاتان پەنجەی تاوانیان بۆ ڤلادیمیر پووتین، سەرۆکی رووسیا درێژکرد.

 

ئەلێکسی ناڤالنی، تەمەن 47 ساڵ، سیاسەتڤانێکی رووسی و سەرۆکی ئۆپۆزیسیۆنی ئەو وڵاتە بوو. ناڤالنی رەخنەگرێکی سەرسەختی ڤلادیمیر پووتین، سەرۆکی رووسیا بوو، چەند جارێکیش چەند خۆپێشاندانێکی لە دژی سەرۆک و سیاسەتی رووسیا رێکخست. 

 

ئەو رەخنەگرە لە ساڵی 2021 لەدوای گەڕانەوەی لە ئەڵمانیا دەستگیرکرا و بە 19 ساڵ بەندکردن سزادرا. 

 

رۆژی 16ـی شوباتی 2024، زیندانی ئای کەی 6 لە ناوچەی خارپی رووسیا رایگەیاند: "ناڤالنی پیاسەیەکی کرد و هەستیکرد تەندروستیی تێکدەچێت و بوورایەوە، تیمەکانی پزیشکی بەزوویی گەیشتنە سەری و ئەمبوڵانسێکیش بانگکرا، بەڵام گیانی لەدەستدا."

 

نەخۆشخانەی شاری لابیتنانگی لە رووسیا بە میدیای وڵاتەکەی راگەیاندووە: "ئەو پزیشک و کارمەندە تەندروستیانەی گەیشتنە زیندان بۆ ماوەی نیو کاژێر خەریکی گەڕاندنەوەی گیانی ناڤالنی بوون، بەڵام بێسوود بوو."