گووگڵ پلانی هەیە گەڕانی ژیریی دەستکرد بکاتە پارە

 

میدیای ئەمریکا، رۆژی پێنجشەممە رایگەیاند، گووگڵ کە زیاتر لە ملیارێک کەس لە سەرانسەری جیهان بەکاریدەهێنن، بەنیازە خزمەتگوزاریی ئەو گەڕانانەی لەلایەن ژیریی دەستکردەوە (AI)ـەوە بەدەستدەهێندرێن بکاتە پارە. 

 

کۆمپانیای گووگڵ کە لەلایەن کۆمپانیای ئالفەبێت خاوەندارێتی دەکرێت، دەیەوێت مۆدێلی بازرگانیکردنی خۆی نوێ بکاتەوە و چاوی لەوەیە بەشێک لە بەرهەمە سەرەکییەکانی بکاتە پارە. 

 

ئەگەر ئەو پلانە جێبەجێ بکات، ئەوە بۆ یەکەمجار دەبێت گووگڵ پارەی بەرامبەر بە دەستەبەرکردنی خزمەتگوزارییەکانی دابنێت. 

 

بەگوێرەی میدیاکانی ئەمریکا، گووگڵ ئێستا لە قۆناخی داڕشتنی پلانە نوێیەکەیەتی ئایا هەندێک تایبەتمەندیی گەڕان و خزمەتگوزارییەکانی بۆ پلاتفۆرمی ژیریی دەستکردەکەی زیاد بکات کە بەناوی جێمینای Gemini ناسراوە و چاتبۆکسی ژیریی دەستکردی گووگڵە هاوشێوەی Chat GPT یە. 

 

بەپێی زانیارییەکان، هێشتا بەرپرسانی باڵای گووگڵ بڕیاری کۆتاییان لەسەر ئەو پلانە نەداوە، بەڵام ئەندازیارانی کۆمپانیاکە لەمێژە دەستیان بە دانانی پلانەکە کردووە تاوەکو بتوانن بە سەرکەوتووترین رێگە جێبەجێی بکەن. 

 

هەروەها میدیاکانی ئەمریکا ئەوەشیان بڵاوکردووەتەوە، کە خزمەتگوزارییە کۆنەکەی گەڕانی گووگڵ هەر بێ بەرامبەر دەمێنێتەوە، بەڵام هەندێک رێکلامکردنی لەگەڵدا دادەنرێت کە بەکارهێنەران لەگەڵ گەڕانەکانیان رێکلامەکانیش دەبینن.

 

کۆمپانیای گووگڵ لەگەڵ فراوانبوونی پێشکەوتنی ژیریی دەستکرد، رووبەڕووی چەندین کێشە هاتووە و لە سەرەتای ئەم ساڵ، خزمەتگوزاری جێمینای، کە دەتوانێت وەڵامی تێکست و وێنەش بداتەوە، هەرای نایەوە، کاتێک لە وەڵامی پرسیاری دامەزرێنەر و باوکی رۆحی ئەمریکا، وێنەی کەسێکی رەشپێستی بڵاوکردەوە.

 

هەروەها لە وێنەی سەربازانی جەنگی جیهانی دووەم بە هەڵە بڵاوکردەوە کە سەربازی رەشپێشت و ئافرەتی ئاسیاوی تێدا بووە. دواتر گووگڵ راستەوخۆ داوای لێبووردنی کرد و رایگەیاند خزمەتگوزارییەکەیان هەندێ کێشەی تەکنیکییان هەیە. 

 

بەڵام لەگەڵ ئەوەشدا، گووگڵ هێشتا یەکەم پلاتفۆرمی گەڕانە لەنێو هێڵی ئینتەرنێت و 80٪ی بەکارهێنەرانی ئینتەرنێت هەر لە گووگڵ زانیارییەکانیان وەردەگرن.