فینلاند بە فەرمی بووە 31مین ئەندامی رێکخراوی ناتۆ

 

رۆژی سێشەممە، 4ـی ئاداری 2023، لە بنکەی سەرەکیی رێکخراوی ناتۆ لە برۆکسل، یانس ستۆڵتنبێرگ، سکرتێری گشتیی ناتۆ و ساولی نینیستۆ، سەرۆکی فینلاند لە کۆنفرانسێکی رۆژنامەڤانیدا بە فەرمی ئەندامێتیی فینلاندیان لە رێکخراوەکە راگەیاند. 

 

یانس ستۆڵتنبێرگ دوای راگەیاندنی فینلاند بە 31مین ئەندامی رێکخراوەکە، گوتی، "ئەمڕۆ رۆژێکی مێژوییە بۆ هەموو ئەندامانی رێکخراوەکە، فینلاند هێزێکی گەورە بە رێکخراوەکە دەبەخشێت. ئێستا فینلاند بەهێزترین هاوپەیمانی لە جیهاندا هەیە."

 

سکرتێری گشتیی ناتۆ گوتیشی، "پووتین دەیویست کۆتایی بە ناتۆ بهێنێت، ئێمە ئەمڕۆ نیشانماندا کە ترس و شەڕانگێزی کار لە ئێمە ناکات و دەمانەوێت بەزوترین کات پێشوازی لە ئەندامێتیی سوێدیش لە رێکخراوەکە بکەین."

 

ساولی نینیستۆ، سەرۆکی فینلاند رایگەیاند، "فینلاند و هاوپەیمانەکانی کار بۆ ئەندامێتیی سوێد لە هاوپەیمانێتییەکەدا دەکەن."

 

لە مانگی نیسانی ساڵی رابردوودا، دوای دەستپێکردنی هێرشەکانی رووسیا بۆ سەر ئۆکراینا، فینلاند و سوێد بەیەکەوە داواکارییان پێشکێش بە رێکخراوی ناتۆ کرد بۆ ئەندامبوون لە رێکخراوەکە.

 

تورکیاش وەکو یەکێک لە ئەندامی رێکخراوەکە پێشتر رایگەیاند کە ئامادەن داواکاریی فینلاند و سوێد بۆ بوونە ئەندامی رێکخراوەکە پەسەند بکەن بەو مەرجەی هەردوو وڵاتەکە بە تایبەتی سوێد ژمارەیەک داواکراویان رادەست بکەنەوە، بەڵام سوێد نەچووە ژێرباری داواکارییەکەی تورکیا، بۆیە رەجەب تەیب ئەردۆغان، سەرۆککۆماری تورکیا تەنیا بە ئەندامبوونی فینلاند لە ناتۆ رازی بووە.

 

رێکخراوی ناتۆ لە 30 وڵاتی ئەندام پێکدێت و فینلاند دەبێتە 31مین ئەندام. بەگوێرەی بڕگەی 5ـی پەیماننامەی ناتۆ کە لە ساڵی 1949دا واژۆ کراوە: هەر هێرشێك بکرێتە سەر ئەندامێکی ناتۆ، بە هێرشی سەر هەموو ئەندامەکانی دادەنرێت و دەبێت هەموو ئەندامەکانی وەڵامی ئەو هێرشە بدەنەوە.