کۆمیسیۆنی هەڵبژاردنەکانی هیندستان: 642 ملیۆن کەس دەنگیان داوە

 

 

رۆژی دووشەممە 03-06-2024 راجیڤ کومار، سەرۆکی کۆمیسیۆنی هەڵبژاردنەکانی هیندستان گوتی: "ریکۆردی جیهانیمان شکاندووە، 642 ملیۆن کەس لە هیندستان دەنگیان داوە، ئەمە ساتێکی مێژووییە بۆ هەموومان."

 

کومار گوتیشی: "ئەمە پیشاندانی هێزی دەنگدەرەکانی هیندستانە، دەبێت خەڵک لەبارەی هێزی دیموکراسییەتی هیندستانەوە بزانن."

 

بەگوێرەی کۆمیسیۆنی هیندستان، 968 ملیۆن کەس مافی دەنگدانیان هەبوو، ٪66.3 دەنگیان داوە و ئەمەش لە ژمارەی دەنگدەرەکانی 2019 کەمترە. ئەوەی کۆمیسیۆن بەدڵخۆشییەوە باسیدەکات: "هیچ رووداوێکی گەورەی تووندوتیژی لەماوەی بەڕێوەچوونی هەڵبژاردندا نەبووە."

 

رۆژی 19-04-2024 لە هیندستان گەورەترین هەڵبژاردنی جیهان دەستیپێکرد و ملیۆنان کەس چوونە سەر سندووقەکانی دەنگدان. هەڵبژاردنەکە 44 رۆژی خایاند و بە حەوت قۆناخ تەواو بوو؛ رۆژی 01-06-2024 دوایین رۆژی دەنگدان بوو. کۆمیسیۆنی باڵای هەڵبژاردنەکانی هیندستان دەڵێت، رۆژی 04-06-2024 پرۆسەی جیاکردنەوەی دەنگەکان دەستپێدەکات.

 

1444 پارت و هاوپەیمانی بەشداریانکرد، کێبڕکێی هەڵبژاردنەکە بۆ بەدەستهێنانی 543 کورسیی پەرلەمان بوو کە بە (لۆک سابا) ناسراوە و 968 ملیۆن کەس، واتە ٪70ـی دانیشتووانی هیندستان مافی دەنگدانیان هەبوو. بەگوێرەی دەستووری هیندستان، نابێت کورسییەکانی لۆک سابا لە 552 کورسی زیاتر بێت.

 

پێش ئەو هەڵبژاردنە، ریکۆردی گەورەترین و بەربڵاوترین هەڵبژاردنی جیهان لە ساڵی 2019 هەر لە هیندستان بوو، کە ئەوکات 912 ملیۆن کەس دەنگیان دا.

 

قۆناخەکانی هەڵبژاردنەکە لەم رێکەوتانە بەڕێوەچوون: قۆناخی یەکەم، 19ـی نیسان؛ قۆناخی دووەم، 26ـی نیسان؛ قۆناخی سێیەم، 7ـی ئایار؛ قۆناخی چوارەم، 13ـی ئایار؛ قۆناخی پێنجەم، 20ـی ئایار؛ قۆناخی شەشەم، 25ـی ئایار و قۆناخی حەوتەم و کۆتایی لە 1ـی حوزەیران بەڕێوەچوو.

 

دوو حیزبی گەورەی هیندستان کێبڕکێیان لەسەر بەدەستهێنانی زۆرترین کورسیی ئەنجوومەنەکە کرد. پارتی گەلی هیندستان، [بەهاراتیا جەناتا] BJP کە نارێندرا مۆدی، سەرۆکوەزیرانی ئێستای هیندستان سەرۆکیەتی، لەگەڵ پارتی کۆنگرێسی نیشتمانیی ئۆپۆزسیۆن INC. 

 

دوو پارتە دیارەکەی هیندستان بانگەشەی هەڵبژاردنیان بۆ 769 بەربژێر کرد و بە گشتی چوار هەزار و 440 کەس لە هەموو پارت و لایەنەکان خۆیان بەربژێر کردبوو. ئەمە جگە لە سێ هەزار و 920 بەربژێری سەربەخۆ. کۆی گشتیی بەربژێرەکان هەشت هەزار و 360 کەس بوون.

 

حیزبەکەی مۆدی کە لە دوو خولی رابردوو زۆرینە بوو، ئێستاش زۆرینەی پەرلەمانە و 293 کورسی هەیە، رکابەرەکەشی لەلایەن مالیکارجوون کارجێ سەرکردایەتیی دەکرێت و 51 کورسی هەیە. هەر پارتێکی هیندستان پێویستی بە 272 کورسی هەیە بۆ ئەوەی ببێتە زۆرینە و حکومەت پێکبهێنێت.

 

هەریەک لە حیزبەکان سەر بە هاوپەیمانییەکن؛ پارتی گەل لە هاوپەیمانیی دیموکراتی نیشتمانییە، کە بە NDA ناسراوە و 34 حیزبی دیکەی تێدایە و زۆرینە راستڕۆن. کۆنگرێسیش لە هاوپەیمانیی نیشتمانیی هیندی بۆ گەشەپێدانی گشتگیر کە بە I.N.D.I.A ناسراوە و 23 حیزبی دیکەی تێدایە و زۆرینە چەپن.

 

کۆمیسیۆنی هەڵبژاردنی هیندستان بۆ یەکەمجار لە مێژووی وڵاتەکە بڕیاریدا رێگە بە نیڤشکان و ئەوانەی تەمەنیان لە 85 ساڵ زیاترە بدات لە ماڵەوە دەنگبدەن.

 

بابەتە گەرمەکانی بانگەشەی هەڵبژاردن خۆیان لە هەریەک لە: چاکسازیی ئابووری، دەستبەرکردنی هەلی کار، چاکسازیی کشتوکاڵ، ژێرخانی تەندروستی، چاکسازیی پەروەردەیی، بەرنامەکانی چاودێریی کۆمەڵایەتی، بەرەوپێشبردنی ژێرخانی وڵات، خاوێنکردنەوەی حکومەت لە گەندەڵی، ئاسایشی نیشتمانی، پاراستنی ژینگە، گۆڕانکاریی دیجیتاڵی و تێکەڵکردنی کولتوور و کۆمەڵگە دەبینیەوە.