بارمتە ئازادکراوەکان لە فڕۆکەخانەی بانگ کۆک. وێنە: AFP
رووداو دیجیتاڵ
ئەو بارمتە تایلاندییانەی لە غەززە ئازاد کران، گەیشتنەوە وڵاتەکەیان و بە باوەشێکی تووند و گریانی بەکوڵی ئازیزانیان، پێشوازییان لێکرا. بارمتەکان لە رێگەی فڕۆکەخانەی بانگ کۆکی پایتەختەوە گەیشتنەوە تایلاند.
پۆنسوان پیناکالۆ، یەکێک لە بارمتە ئازادکراوەکان دەڵێت، "لەدوای ئازادکردنەکەم، لەڕووی جەستەیی و دەروونییەوە هەست بە باشی دەکەم".
کۆنگ پاناسودلامای، باوکی بارمتەیەکی ئازادکراوە و باس لەوە دەکات، "پێموابوو ئێمە کوڕەکەمان لەدەستداوە، بەڵام ئەو گەڕایەوە و هەروەکو واتای ناوەکەی وایە: رەحمەتێک لە بەهەشتەوە".
لە کۆی ئەو 23 بارمتە تایلاندییەی لەلایەن حەماسەوە ئازادکران، 17یان گەیشتنەوە وڵاتەکەیان، بەڵام بەگوێرەی بەرپرسانی تایلاندی، هێشتا نۆ هاووڵاتیی دیکەیان هەر لەدەست گرووپە چەکدارەکانی فەلەستینن.
پارنپری باهیدا نوکارا، وەزیری دەرەوەی تایلاند گوتی، "ئێمە لە هەوڵەکانمان بەردەوام دەبین تاوەکو دڵنیابین لەوەی ئەو نۆ بارمتەیەی دیکەش ئازاد دەکرێن و دەگەڕێنەوە بۆ تایلاند".
نزیکەی 30 هەزار تایلاندی لە ئیسرائیل کار دەکەن و لەکاتی هێرشی چەکدارانی حەماس لە 7ی تشرینی یەکەم، 39 تایلاندی کوژران و 32ی دیکەشیان بە بارمتەگیران و دوای زیاتر لە 40 رۆژ، 23 لەو بارمتانە ئازادکران.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ