مۆبایلی ماجیک ڤی 2
رووداو دیجیتاڵ
تەنکترین مۆبایل لە جیهاندا لە لەندەن نمایشکرا کە ناوی "ماجیک ڤی 2"ە. ئەو کۆمپانیایەش کە بەرهەمی هێناوە دەڵێت، تەنکترین مۆبایلی چەماوەی جیهانە و داهاتووی مۆبایلە گەڕۆکەکان لە مۆدێلە چەماوەکان دەبینن.
بۆند ژانگ، بەڕێوەبەری لقی لەندەنی کۆمپانیای ئۆنەری چینی، باسی بەرهەمە نوێیەکەیان دەکات و دەڵێت، "مۆبایلی ماجیک ڤی 2، تەنکترین تەلەفۆنی چەماوەیە لە جیهاندا؛ ئێمە لە کۆمپانیای ئۆنەر داهاتووی مۆبایلە گەڕۆکەکان لە مۆدێلە چەماوەکان دەبینین."
تەنکیی مۆبایلەکە 9.9 میلیمەترە، واتە کەمتر لە سانتیمەترێک؛ بە 25% تەنکترە لە سامسۆنگ گالاکسی 5.
بێن وود، شارەزای بازاڕی مۆبایل دەڵێت، "بازاڕی مۆبایلی چەماوە سەرنجڕاکێشە، ئێستا رکابەرییەکی قورس لەنێوان سامسۆنگ و کۆمپانیا چینییەکاندا هەیە، بەم مۆبایلە تەنکە چەماوەیە ئۆنەر بە راستی سەلماندی کە توانایەکی گەورەی هەیە."
هەرچەندە پشکی سامسۆنگ لەو 1.3 ملیار مۆبایلە زیرەکەی جیهان، نزیکەی 24%ە، بەڵام مۆبایلی ماجیک ڤی 2 تایبەتمەندیی زیاترە، تەنکترە و پێشکەوتووترە.
بێن وود ئاماژەی بەوەش کرد، "مۆبایلی ئۆنەر ڤی 2، پێوەرەکانی بەرهەمهێنانی مۆبایلە چەماوە تەنکەکانی بردە قۆناخێكی نوێوە. بۆیە ئێستا گەورە کۆمپانیاکانی مۆبایل لە کۆمپانیا چینییەکان نیگەرانن و بە رکابەرێكی سەرسەختی خۆیان لە بازاڕەکانی جیهان، دەیبینن."
بەگوێرەی داتا فەرمییەکان، تەلەفۆنی ماجیک ڤی 2ی کۆمپانیای ئۆنەر لە ساڵی 2024 لە بازاڕەکانی جیهان بە نزیکەی 1200 دۆلار، نمایش دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ