لە رووداوێکی تەقەکردندا لە یانەیەکی شەوانەی ئەمریکا دوو کەس کوژران

 

 

رۆژی یەکشەممە 2ی تەممووزی 2023 پۆلیسی شاری باڵتیمۆر رایگەیاند، لە ئەنجامی هێرشێکی چەکداری لەنێو یانەیەکی شەوانەی شارەکەدا، ئافرەتێکی 18 ساڵان و پیاوێکی 20 ساڵان کوژراون و سێ لە بریندارەکانیش باری تەندروستییان ناجێگیرە.

 

پۆلیسی شارەکە ئەوەشی ئاشکرا کردووە، هێرشکارەکە دوای ئەوەی دەستڕێژی بەنێو یانەکەدا کردووە، هەڵاتووە و تائێستا دەستگیر نەکراوە، بەڵام پۆلیس بەردەوامە لە گەڕان و پشکنین بەدوایدا.

 

برێندن سکۆت، سەرۆکی شارەوانیی بۆڵتیمۆر رایگەیاند، "لێکۆڵینەوە لە ‌هێرشەکە بەردەوامە و کۆڵنادەین تاوەکو ئەو کەسانەی بەرپرسیارن لە ‌هێرشەکە دەستگیر نەکرێن."

 

ئەو رووداوە لە یەکەم رۆژی پشووی سێ رۆژەی ئەمریکایە، کە بە پشووی رۆژی نیشتمانیی ئەمریکا ناسراوە، کە 4ی تەممووزە و ئەمریکییەکان بە ئاهەنگ و کۆبوونەوە و رێوڕەسمی فەرمی یادی دەکەنەوە.

 

بەگوێرەی میدیای ئەمریکا، ئاهەنگەکە تایبەت بووە بە رۆژی نیشتمانیی ئەمریکا و سەتان کەس ئامادەی بوون، یەکێک لە بەشداربووانی ئاهەنگەکە سەبارەت بە رووداوی تەقەکردنەکە رایگەیاندووە، گوێبیستی تەقاندنی 20 بۆ 30 گولـلە بووە. شایەتحاڵێکی دیکەش رایگەیاندووە، تەقەکردنەکە زۆر بووە و "هەستم کرد تەواو نابێت،" بەڵام تائێستا پۆلیس هیچ زانیارییەکی لەسەر هێرشکارەکە بڵاونەکردووەتەوە.

 

هەروەها پۆلیس رایگەیاندووە، لەو 28 بریندارە، نۆیان بە ئامبوڵانس رەوانەی نەخۆشخانە کراون و ئەوانی دیکەش هەر لە شوێنی رووداوەکە تیمار کراون.

 

هەروەها نەخۆشخانەی گشتیی بۆڵتیمۆر ئاشکرای کردووە، لەدوای رووداوەکە 19 برینداریان وەرگرتووە و چارەسەریان بۆ کراوە، زۆربەشیان رەوانەی ماڵەوە کراونەتەوە.