ڤیدیۆ.. تەقینەوەی گاز لە کینیا زیاتر لە 300 کەس دەکاتە قوربانی

 

تەقینەوەکە بەرەبەیانی رۆژی هەینی، 2-2-2024 لەنێو باڵەخانەیەکی ناوچەیەکی پیشەسازی لە پایتەختی کینیا روویداوە. ئاگرێکی گەورەی لێکەوتەوە و بەگوێرەی شایەتحاڵی رووداوەکە، زۆربەی باڵەخانە بەرزەکانی شارەکە لەراندووەتەوە و بە سەتان کەسیشی بریندارکردووە.

 

پۆلیسی کینیا رایگەیاندووە، تەقینەوەکە لە کارگەیەک لە ناوچەی پیشەسازی لە باشووری رۆژهەڵاتی شارەکە روویداوە. بەوهۆیەوە باڵەخانەی کارگەکە و ژمارەیەک ئۆتۆمبێلی نزیک لە باڵەخانەکە زیانێکی زۆریان پێگەیشتووە و، تیمی فریاگوزاریش تائێستا سەرقاڵی رزگارکردنی خەڵکن کە کەوتوونەتە ژێر داروپەردووی باڵەخانەکەوە.

 

هاوکات تیمە تەندروستییەکانیش رایانگەیاندووە، رەنگە ژمارەی قوربانییەکان زیاد بکات. 

 

پۆلیسی کینیا لەبارەی هۆکاری تەقینەوەکە ئاماژەی بەوە کردووە، ژمارەیەک لە کارمەندانی کارگەکە خەریکی پڕکردنەوەی بوتڵە گازەکان بوون، لەو کاتەدا بوتڵەکان تەقیونەتەوە و زیانێکی زۆریان بە ناوچەکە گەیاندووە. 

 

هەروەها دەسەڵاتدارانی نایرۆبی ئاماژەیان بەوە کردووە یەکێک لەوانەی گیانی لەدەستداوە کارمەندی کارگەکە بووە و ئەوی دیکەشیان منداڵێک بووە. 

 

تیمی تەندروستیی کینیایی ئەوەشی ئاشکرا کردووە، زیاتر لە 270 لە بریندارەکانیان گواستووەتە بۆ نەخۆشخانەکان بەمەبەستی وەرگرتنی چارەسەری خێرا و هەر لە شوێنی رووداوەکەش، چارەسەریان بۆ زیاتر لە 27 کەس کردووە کە برینەکانیان سووک بوون.

 

ئیسحاق مووارا، گوتەبێژی حکومەتی کینیا داوای لە هاووڵاتیان کردووە لە ناوچەی رووداوەکە دووربکەونەوە، چونکە ئەگەری تەقینەوەی دیکە هەیە، بەهۆی ئەوەی هێشتا ئاگرەکە بە تەواوەتی کۆنترۆڵ نەکراوە.