ئەردۆغان بۆ بایدن: ئیسرائیل ئاگربەستی لە غەززە ناوێت

 

رۆژی پێنجشەممە، 1ی ئابی 2024، رەجەب تەیب ئەردۆغان، سەرۆککۆماری تورکیا و جۆ بایدن، سەرۆکی ئەمریکا بە تەلەفۆن قسەیان کرد. سەرۆککۆماری تورکیا بە بایدنی راگەیاندووە: "ئیسرائیل ئاگربەستی لە غەززە ناوێت. کوشتنی ئیسماعیل هەنییە، بەرپرسی مەکتەبی سیاسی حەماس زەبرێکی گەورەی لە گفتوگۆکان بۆ گەیشتن بە ئاگربەست لە غەززە دا."

 

رۆژی چوارشەممەی رابردوو، لە تاران هەنییە و پاسەوانەکەی کوژران، لەکاتێکدا بۆ بەشداریکردن لە رێوڕەسمی دەستبەکاربوونی مەسعود پزیشکیان، سەرۆککۆماری ئێران چووبوونە ئەو وڵاتە. 

 

حەماس و ئێران، ئیسرائیلیان بە کوشتنی تۆمەتبارکرد و هەڕەشەی تۆڵە سەندنەوەیان کرد، بەڵام تاوەکو ئێستا تەلئەڤیڤ هیچی لەبارەوە نەگوتووە. 

 

بە گوێرەی میدیای تورکیا، لەو پەیوەندییە تەلەفۆنییەدا سەرۆککۆماری تورکیا ئاماژەی بەوەش کردووە، "حکومەتی ئیسرائیل هەموو کارێکی کردووە بۆ ئەوەی پیشانی بدات ئاشتی و ئاگربەستی لە غەززە ناوێت. هەروەها، تەلئەڤیڤ کار بۆ ئەوە دەکات کە جەنگی غەززە فراوان بکات و هەموو ناوچەکە بگرێتەوە."

 

ئەو پەیوەندییە دوای ئەوە هات کە حکومەتی تورکیا لە راگەیێندراوێکدا گوتی، هەریەکە لە ئیڤان گێرشکۆڤیچ، رۆژنامەڤانی ئەمریکی و پۆڵ ویلان، ئەندامی هێزی دەریایی ئەمریکا رۆژی پێجشەممە ئازاد کراون. ئەو دوو کەسە لە رووسیا دەستبەسەر کرابوون و بە نێوەندگیریی تورکیا ئازادکران.

 

میدیای ئەمریکی لە زاری چەند بەرپرسێکی ئەو وڵاتە ئاماژە بەوە دەکات، بەگوێرەی رێککەوتنی هەردوولا، رووسیا 24 بەندکراوی ئەمریکا و رۆژئاوا ئازاد دەکات و لە بەرامبەریشدا هەشت بەندکراوی رووسی ئازاد دەکرێن. لەو پەیوەندییەدا، بایدن سوپای ئەردۆغانی کرد بۆ هەوڵەکانیان بۆ گەیشتن بەم رێککەوتنە.