هەڵەیەک روویدا! دووبارە هەوڵبدە
رووداو دیجیتاڵ
وەزارەتەکانی داد و گەنجینەی ئەمریکا بە تۆمەتی هاوکاریکردنی پیشەسازیی سەربازیی ئێران، سزایان بەسەر چوار کۆمپانیا و دوو کەس لە ئێران، ئیمارات و چیندا سەپاند.
رۆژی سێشەممە 1ی نیسانی 2025 وەزارەتی دادی ئەمریکا لە راگەیێندراوێکدا بڵاویکردەوە، "نووسینگەی چاودێریی سامانی بیانی لە وەزارەتی گەنجینەی ئەمریکا بە هاوئاهەنگی وەزارەتی دادی ئەمریکا، شەش کۆمپانیا و دوو کەسیان لە ئێران، ئیمارات و کۆماری میللی چین بە ئامانج گرت کە بەرپرسیارن لە دابینکردنی پارچەکانی دروستکردنی درۆن بۆ پیشەسازیی ئاسمانیی فەیلەقی قودسی ئێران."
وەزارەتەکە لە راگەیێندراوەکەیدا دەڵێت، "ئەم تۆڕە کەلوپەلیان بۆ دامەزراوە پێشەسازییە سەربازییەکانی دیکەی ئێران، لەوانە کۆمپانیای پیشەسازیی فرۆکەوانیی ئێران و گرووپی پیشەسازی شەهید باقری دابینکردووە."
ئیدارەی دۆناڵد ترەمپ سیاسەتی ئەوپەڕی گوشاری بەرامبەر ئێران و بەرنامە ئەتۆمییەکەی گرتووەتەبەر.
بە گوێرەی راگەیێندراوەکە، ئەوە دووەم لیستی سزاکانی ئەمریکایە بۆ سەر پیشەسازیی چەکی ئێران لە 4ی شوباتەوە.
هاوکات سکۆت بیسێنت، وەزیری گەنجینەی ئەمریکا لەبارەی سزادانی ئەو کەس و کۆمپانیایانە رایگەیاند، "زیادبوونی ناردنی مووشەک و درۆنی ئێرانی بۆ گرووپە تیرۆریستییەکان لە ناوچەکە و رووسیا بۆ بەکارهێنانییان دژی ئۆکراینا مەترسییە لەسەر هاووڵاتییانی سڤیل."
وەزیری گەنجینەی ئەمریکا دەڵێت، "وەزارەتی گەنجینە لە رێگرییەکانی لە دامەزراوەکانی پیشەسازیی سەربازیی ئێران و بڵاوکردنەوەی درۆن و مووشەک بەردەوام دەبێت کە دەگەنە دەست ئەو لایەنانەی دەبنە هۆی ناسەقامگیری."
لە راگەیێندراوەکەی وەزارەتی دادی ئەمریکادا هاتووە، وەزارەتی داد تۆمەتی ئاراستەی حوسێن ئەکبەری تەمەن 63 ساڵ و رەزا عەمیدی تەمەن 62 ساڵ و کۆمپانیای "راهـ رووشد" کە بارەگاکەی لە ناوچەی رۆژهەڵاتی نیویۆرکە کردووە. "تۆمەتباران" پێداویستیان بۆ سوپای پاسدارانی ئێران دەبینکردووە.
سو جەی بەی، بەرپرسی یەکەی ئاسایشی نیشتمانی لە وەزارەتی دادی ئەمریکا لەبارەی سزادانی ئەو دوو کەس و کۆمپانیا ئێرانییە رایگەیاند، وەزارەتی داد لە سیاسەتی زۆرترین گوشار لەسەر دەسەڵاتی ئێران بەردەوام دەبێت و" ئەو گرووپانەش هەڵدەوەشێنینەوە کە تەکنەلۆژیای ئەمریکی بۆ سوپای ئێران و رێکخراوە تیرۆرستییەکان دەنێرن."
تشرینی دووەمی پار، ئاژانسی نێودەوڵەتی وزەی ئەتۆم ئاشکرای کرد، "ئێران نزیکەی 204 کیلۆگرام لە یۆرانیۆمی پیتێندراو بە رێژەی 60%ی هەیە؛ دوای سێ مانگ ژمارەکەی ئەپدەیتکردەوە و گوتی ئێستا ئێران 275 کیلۆی هەیە؛ لە رووی زانستییەوە هەر بۆمبێكی ئەتۆمی پێویستی بە 40 کیلۆگرام یۆرانیۆمی پیتێندراو بە رێژەی 90% هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ