رووداو دیجیتاڵ
حکومەتی کۆماری چیک بڕیاری دا خاڵەکانی پشکنین لەسەر سنووری سلۆڤاکیا هەڵبگرێتەوە کە ساڵی رابردوو بەهۆی زیادبوونی ژمارەی کۆچبەرانەوە، داینابوون. وەزارەتی ناوخۆی ئەو وڵاتە دەڵێت، ژمارەی کۆچبەران کەمبووەتەوە و پێویستیان بە خاڵەکانی پشکنین نەماوە.
بەگوێرەی وەزارەتی نێوخۆی چیک، ساڵی رابردوو 12 هەزار کۆچبەری نایاسایی لە وڵاتەکەیان دەستگیرکرابوون کە زۆربەیان خەڵکی سووریا و رۆژئاوای کوردستان بوون، دوای ئەوە حکومەتی ئەو وڵاتە بە پێویستی زانی لەسەر سنوور رێگری لە رۆیشتنی کۆچبەرە نایاساییەکان بکات و لە 29ـی ئەیلوول لە 27 دەروازەی سنووریی نێوان چیک و سلۆڤاکیا، خاڵەکانی پشکنینی دانا. لە سەرەتادا بڕیاربوو خاڵەکان تەنیا بۆ ماوەی 10 رۆژ بمێننەوە، بەڵام بۆ ماوەی چوار مانگ کاریان پێکرا.
سلۆڤاکیا و چیک سەر بە ناوچەی شنگنن کە بۆ هاتووچۆکردن بەنێویاندا، هاووڵاتییەکانیان پێویستیان بە ڤیزە نییە. لە یەکشەممەی داهاتووەوە، چیدیکە پشکنین بۆ ئۆتۆمبێل و بارهەڵگرەکان ناکرێت.
ڤیت راکوسان، وەزیری نێوخۆی کۆماری چیک دەڵێت، مانگی ئەیلوول رۆژانە 400 کۆچبەریان دەستگیردەکرد. راکوسان رۆژی چوارشەممە گوتی: "ژمارەکە بە شێوەیەکی بەرچاو دابەزیوە".
وەزارەتی ناوخۆی چیک هەروەها رایگەیاند، پشکنین بۆ زیاتر لە سێ ملیۆن کەس کراوە و رێگری لە دەربازبوونی دوو هەزار و 545 کەس کراوە، نزیکەی 10 هەزار کۆچبەر و 141 قاچاخچیی گومانلێکراویش دەستگیرکراون. وەزارەتەکە دەڵێت "کۆچبەران چیکیان بەکارهێناوە بۆ پەڕینەوە بۆ وڵاتانی رۆژئاوای ئەوروپا".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ