رووداو دیجیتاڵ
یانەی بارسێلۆنا لە بڵاوکراوەیەکی فەرمیدا رایگەیاند کە بڕگەی مافی کڕین لە گرێبەستەکانی جواو کانسێلۆ و جواو فیلیکس کارا نەکات، بەڵام دواتر ئەو بڵاوکراوەیەی رەتکردەوە.
کانسێلۆ هاوینی رابردوو بەشێوەی خواستن لە یانەی مانچێستەر سیتییەوە پەیوەندی بە یانە کەتەلۆنییەکە کرد و لە گرێبەستەکەدا بژاردەی کڕینی هەبوو. هاونیشتمانییەکەی جواو فیلیکسیش بەشێوەی خواستن لە یانەی ئاتلێتیکۆ مەدریدەوە پەیوەندی بە یانەی بلاوگراناوە کرد و ئەویش بەهەمانشێوە بژاردەی کڕینەوەی لەلایەن بارسێلۆناوە هەبوو.
یانە کەتەلۆنییەکە لە ماڵپەڕی فەرمی خۆیدا ئاشکرایکردووە، ئەمڕۆ یەکشەممە 30ـی حوزەیران دوای کۆتاییهاتنی ماوەی خواستنیان، دوو یاریزانە پۆرتوگالییەکە لە یانەکە دەڕۆن لەلایەن بارسێلۆناوە ناکرێنە گرێبەستی هەمیشەیی.
یانە کەتەلۆنییەکە لە پێگەی فەرمی خۆیدا رایگەیاندووە "جواو فیلیکس لەگەڵ بارسێلۆنا بەردەوام نابێت".
هەروەها لە بڵاوکراوە فەرمییەکەدا ئەوەش هاتووە "سوپاس بۆ تۆ جواو، چونکە ئەمڕۆ ماوەی خواستنەکەت لە یانەی ئاتلێتیکۆ مەدریدەوە کۆتایی دێت".
یانە ئیسپانییەکە هەروەها ئاماژەی بەوەشکردووە "جواو فیلیکس و جواو کانسێلۆ لە بارسێلۆنا بەردەوام نابن".
ئاماژەی بەوەشکردووە، گرێبەستی ئەو دوو یاریزانە لە 30ـی حوزەیران کۆتایی دێت، بۆیە دەگەڕێنەوە یانەکانیان.
دوو یاریزانە پۆرتوگالییەکە لەم ماوەیەدا لەگەڵ هەڵبژاردەی پۆرتوگالن بۆ بەشداریکردن لە یۆرۆی 2024 لە ئەڵمانیا.
ئێستا هەڵبژاردەی پۆرتوگال ئامادەکاری دەکات بۆ ئەوەی سبەی دووشەممە لە قۆناخی 16ـەی یۆرۆدا رووبەڕووی سلۆڤینیا ببێتەوە.
هەندێک لە سەرچاوەکان باس لەوە دەکەن کە هۆکاری سڕینەوەی بڵاوکراوەکە لەلایەن بارسێلۆنا بۆ ئەوە دەگەڕێتەوە، کە یانەکە هێشتا بیر لەوە دەکاتەوە ئەو دوو یاریزانە بەخواستن بهێڵێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ