ئێرلینگ هالاند بووە یاریزانی بۆرووسیا دۆرتموند
رووداو - هەولێر
بە فەرمی یانەی بۆرووسیا دۆرتموند گرێبەستی لەگەڵ ئێرلینگ هالاندی هێرشبەری نەرویجی واژۆکرد.
دوای ئەوەی یانەکانی مانچێستەر یونایتد و یوڤێنتوس بە رژدی کاریان لەسەر گواستنەوەی ئەو یاریزانە کرد، بەڵام لە کۆتاییدا بۆرووسیا دۆرتموند ئەو یاریزانەی لە چنگی یانە گەورەکانی ئەوروپا دەرهێنا و گرێبەستی لەگەڵدا واژۆکرد.
گرێبەستی هێرشبەرەکەی پێشووی رێدبول سالزبورگ بۆ ماوەی چوار ساڵ و نیوە و لە لە هاوینی 2024دا کۆتاییدێت.
چەند رۆژنامەیەکی ئەڵمانیش ئاماژەیان بەوەکردووە و کە بڕی گرێبەستەکە 20 ملیۆن یۆرۆیە ، مووچەکەشی 5 ملیۆن یۆرۆی ساڵانەیە.
هالاند لە رێدبول سالزبورگ ئاستێکی بەرزی پێشکەشکرد و لە قۆناخی کۆمەڵەکانی چامپیۆنزلیگیشدا لەگەڵ یانەکەی 8 گۆڵی تۆمارکرد، ئێستا لە قۆناخی 16ـی چامپیۆنزلیگدا بۆرووسیا دۆرتموند سەرکەوتووە و یاساکانی خولەکەش گۆڕاوە، لەبەر ئەوە هالاند دەتوانێت لە قۆناخی 16ـی چامپیۆنزلیگدا یاریبکات.