یانەکانی کوردستان لە خولی بالەی عێراق براوەن

 

 

یارییەکانی وەرزی ئەمساڵی خولەکە بە بەشداری 15 یانەیە و یارییەکانی بەشێوازی دوو کۆمەڵە بەڕێوەدەچن، یارییەکانی کۆمەڵەی یەکەم لە شاری بەغدایە و یارییەکانی کۆمەڵەی دووەم لە شاری سلێمانیە و یانەکانی هەولێر، دوکان لەگەڵ پێشمەرگەی سلێمانی نوێنەری هەرێمی کوردستانن لە خولەکەدا. 

 

یانەی هەولێر کە لە کۆمەڵەی یەکەمدا یاریی دەکات، دوو یاری رابردووی بەسەرکەوتن تەواوکرد، کاتێک لە یانەکانی حەدیسە و مەسافی شیمالی بردەوە، ئەمڕۆ لە ئەرکێکی قورسدا شەڕی بردنەوەیەکی دیکە لەگەڵ یانەی شورتە دەکات.

 

ئیبراهیم قادر، بەرپرسی راگەیاندنی یانەی وەرزشی هەولێر لە لێدوانێکی تایبەت بە تۆری میدیایی رووداو، رایگەیاند " ئامادەکارییەکی زۆرباشمان کردووە بۆ ئەم یارییە و یاریزانانمان مۆڕڵیان بەرزە دەیانەوێت سێیەم سەرکەوتن تۆمار بکەن". 

 

لە کۆمەڵەی دووەمدا یانەکانی پێشمەرگەی سلێمانی یەکەم سەرکەوتنی تۆمارکردووە و ئەمڕۆ لەگەڵ یانەی بەلەد یاریدەکات، هەروەها یانەی دوکان کە دووەم وەرزییەتی لە خولی نایابی عێراق یاریدەکات لە یەکەم یاریدا بەهۆی ئەوەی کە تیپەکە کێشەی دارای هەبوو، یاریزانەکانی یارییان بۆ نەکرد و بەرامبەر یانەی جەیش یارییەکەیان بە دۆڕان هەژمارکرا، یانەی دوکان ئەمڕۆ لەگەڵ یانەی غازی باشوور یاریدەکات کە پڕە لە ئەستێرەی هەڵبژاردەی عێراق و لە چەند رۆژی رابردوودا نازناوی جامی سوپەری بالەی عێراقی بردەوە. 

 

وەرزی رابردوو یانەی بەحری نازناوی خولی نایابی بالەی عێراقی بردەوە، هەریەک لە یانەکانی غازی جنوب و پێشمەرگەی سلێمانی لە پلەکانی دووەم و سێیەم هاتن.