رووداو دیجیتاڵ
ئەمشەو یاریی کۆتایی خولی یانە پاڵەوانەکانی ئەوروپا، لەنێوان هەردوو یانەی مانچێستەر سیتی و چێڵسی بەڕێوەدەچێت، بەر لە یارییەکە چەند ئامارێکی سەرنجڕاکێش هەن کە ئەمانەن.
* هەردوو یانە ئینگلیزییە یەکەمجارە لە دوای 50 ساڵ لە یارییەکی ئەوروپیدا بەرامبەر یەکدی یارییدەکەن.
* ئەمە سێیەمجار لە یاریی کۆتایی چامپیۆنزلیگدا، دوو یانەی ئینگلیزی بەرامبەر یەکدی یاریی بکەن، پێشتر لە 2008 مانچێستەر یونایتد و چێڵسی، دوو ساڵیش لەمەوبەر لیڤەرپوول و تۆتێنهام رووبەڕووی یەکبوونەوە.
* لە ساڵی 2000ـەوە 7 جار دوو یانەی یەک وڵات لە یاریی کۆتاییدا بەرامبەر یەکدی یارییانکردووە، ئەو کاتە ریال مەدرید و ڤالێنسیا، لە 2003 میلان و یوڤێنتوس 2008 چێڵسی و مانچێستەر یونایتد، لە 2013 بایرن میونشن و دۆرتموند، لە 2014 و 2016 ریال مەدرید و ئاتلێتیکۆ مەدرید، لە 2019 لیڤەرپوول و تۆتێنهام.
* یانەی مانچێستەر سیتی ژمارەی یانە ئینگلیزییەکانی لە یاریی کۆتایی پاڵەوانێتییەکی ئەوروپیدا بۆ 9 یانە بەرزکردەوە، تەنیا ئەڵمانیا و ئیتالیا 6 یانەی جیاوازیان گەیشتوونەتە یاریی کۆتایی.
* یاریگەی دراگاو لەکاتێکدا پێشوازی لە هەردوو یانە دەکات، مانچێستەر سیتی لەم وەرزەدا لە قۆناخی کۆمەڵەکاندا لەو یاریگەیەدا بەرامبەر پۆرتۆ یارییکرد و یەکسانبوون، چێڵسی 4 یاریی لەو یاریگەیەدا ئەنجامداوە، تەنیا یەک یاریی بردووەتەوە.
* هەردوو یانەی مانچێستەر سیتی و چێڵسی لەم وەرزەی چامپیۆنزلیگدا تەنیا 4 گۆڵیان لێکراوە، 2006 کاتێک بارسێلۆنا بووە پاڵەوانی چامپیۆنزلیگ ئەم رێژە کەمەی گۆڵی لێکرابوو.
* پێپ گواردیۆلا و تۆماس توخێل، 7 یارییان بەرامبەر یەکدی کردووە، گواردیۆلا 4 بردنەوە، توخێل 2 بردنەوە و یارییەکیشیان بەیەکسانبوون کۆتاییهاتووە.
* توخێل یەکەم راهێنەرە لە دوو وەرزی لەسەریەک لەگەڵ دوو یانەی جیاواز بگاتە یاریی کۆتایی چامپیۆنزلیگ، وەرزی رابردوو کە راهێنەری پاریس سانجێرمان بوو نازناوەکەی لەدەستدا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ