کارلۆ ئەنچێلۆتی
رووداو دیجیتاڵ
کارلۆ ئەنچێلۆتی، راهێنەری یانەی ریال مەدرید وەڵامی ئەو دەنگۆیانە دەداتە کە باس لە وەرگرتنی راهێنەرایەتی هەڵبژاردەی بەرازیل دەکەن.
دوای دوورخستنەوەی دۆریڤال جونیۆر، لە راهێنەرایەتی هەڵبژاردەی بەرازیل، چەند راهێنەرێکی بەنێوبانگ ناویان بەو هەڵبژاردەیە بەستراوەتەوە و یەکێکیان کارلۆ ئەنچێلۆتی، راهێنەری یانەی ریال مەدریدە.
لە کۆنگرەی رۆژنامەڤانی بەر لە یارییەکەیان بەرامبەر یانەی لیگانێس، کارلۆ ئەنچێلۆتی، بە رۆژنامەڤانانی گوت "گرێبەستەکەم لەگەڵ ریال مەدرید روونە، هیچ شتێک نییە زیادی بکەم، حەزم لە هەڵبژاردەی بەرازیل، یاریزانەکان و هاندەرانیانە، بەڵام من گرێبەستم لەگەڵ ریال مەدرید هەیە."
ئەم قسانەی ئەنچێلۆتی لەکاتێکدان، ماوەیەکی زۆرە ناوی راهێنەرە ئیتاڵییەکە بە هەڵبژاردەی بەرازیلەوە بەستراوەتەوە، بەر لە دەستنیشانکردنی دۆریڤال جونیۆریش وەکو راهێنەری هەڵبژاردەکە، فیدراسیۆنی تۆپی پێی وڵاتەکە زۆر هەوڵیدا کارلۆ رازیبکات ببێتە راهێنەری هەڵبژاردەکە، بەڵام ریال مەدرید گرێبەستی ئەنچێلۆتیی نوێکردەوە و ئەو راهێنەرە لە ریال مەدرید مایەوە.
میدیای بەرازیل دەڵێت "سەرۆکی فیدراسیۆنی تۆپی پێی بەرازیل، کارلۆ ئەنچێلۆتیی خۆشدەوێت و زۆر حەزدەکات ئەو راهێنەرە ئیتاڵییە ببێتە راهێنەری داهاتووی سامبا، بەڵام زەحمەتە کارلۆ لەم قۆناخەدا لە ریال مەدرید بڕوات."
فیدراسیۆنی تۆپی پێی بەرازیل، شەوی هەینی لەسەر شەممە، بەفەرمی بڕیاری دوورخستنەوەی دۆریڤال جونیۆر، راهێنەری هەڵبژاردەکەیدا، ئێستا هەریەکە لە کارلۆ ئەنچێلۆتی، پێپ گواردیۆلا، جۆزێ مۆرینیۆ، یۆرگن کڵۆپ و خۆرخی خیسۆس ناویان لەگەڵ هەڵبژاردەکە دێت، بەڵام بەپێی زۆرینەی سەرچاوەکان، نزیکترین بژاردە بۆ وەرگرتنی راهێنەرایەتی سیلیساو، خۆرخی خیسۆسی راهێنەری یانەی هیلالی سعودیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ