رۆناڵدۆ لە کڕینی ڤایادۆلید نزیکبووەتەوە
رووداو - هەولێر
رۆناڵدۆ نازاریۆ دالیما، ئەستێرەی پێشووی تۆپی پێی بەرازیل لە کڕینەوەی بەشێکی یانەی ڤایادۆلیدی ئیسپانی نزیکبووەتەوە.
رۆناڵدۆ بۆ کڕینەوەی زۆرینەی پشکەکانی یانەکە 30 ملیۆن یۆرۆی پێشکەشی بەرپرسانی یانەکە کردووە و لەئەگەڕی کڕینەوەیدا رۆناڵدۆ دەبێتە سەرۆکی یانەکەش.
رێککەوتنی نێوان رۆناڵدۆ و ڤایادۆلید لەدوا هەنگاوەکانیدایە و لەماوەی دوو هەفتەی داهاتوو پێدەچێت بەفەرمی کڕینەوەی یانەکە لەلایەن رۆناڵدۆ رابگەیێندرێت.
رۆناڵدۆ لەگەڵ کارلۆس سوارێز، خاوەنی ئێستای یانەکە رێککەوتووە بۆ ئەوەی لەگەڵ ئەو بەردەوام بێت و پۆستی بەڕێوەبەری جێبەجێکاری یانەکە وەربگرێت.
پێش رۆناڵدۆ دوو دەستەوارەی دیکە بۆ کڕینەوەی یانەکە لە چین و ئەمریکای باشوور پێشکەشی کارلۆس سوارێز کرابوون کە لە دەستەوارەکەی رۆناڵدۆ باشتریش بوون، بەڵام ئەو بەلایەوە باشترە یانەکە بفرۆشێتە ئەستێرە بەرازیلییەکە.
ڤایادۆلید لە وەرزی نوێی لالیگادا تاوەکو ئێستا 2 یاریی ئەنجامداوە و خاڵێکی بەدەستهێناوە.