بەفەرمی چاڤی هێرناندێز بووە راهێنەری سەد

رووداو - هەولێر

یانەی سەدی قەتەری، بەشێوەیەکی فەرمی چاڤی هێرناندێز، ئەستێرەی یانەکەی وەک راهێنەری یانەکە بۆ وەرزی داهاتوو دەستنیشانکرد.

یانەکە لەسەر ئەکاونتی فەرمی خۆی لە توویتەر بڵاویکردووەتەوە، چاڤی لەسەرەتای وەرزی داهاتووەوە وەک راهێنەری یانەکە دەستبەکاردەبێت، هەریەکە لە سێرجیۆ ئوریۆل، ئیڤان تۆرێس، ئوسکار هێرناندێز، خۆسێ مانوێل، دەیڤد پاراتس، ئانتونیۆ لوبو، سێرخیۆ گارسیا و ئانتۆنیۆ رامولاس، لە دەستەی راهێنەرایەتی یانەکەدا هاوکاری چاڤی دەکەن.

رسمياً : #تشافي مدرباً للفريق بدايةً من الموسم القادم .. وسيبدأ تشافي مهامه مع طاقمة الذي يضم
سيرجيو اوريول، إيفان توريس، أوسكار هيرنانديز، جوزيه مانويل ، ديفيد باراتس،انتونيو لوبو ، سيرجيو غارسيا ، انتونيو ترامولاس#السد https://t.co/QSwNMUo8ZN

— AlSadd S.C | نادي السد (@AlsaddSC) May 28, 2019

چاڤی هێرناندێز لە ساڵی 2015 دوای بەجێهێشتنی یانەی بارسێلۆنا روویکردە یانەی سەد و دوو هەفتە لەمەوبەر، بەیەکجاری وازی لە یارییکردن هێنا.

چاڤی پێشتر لە هەڤپەیڤینێکی رۆژنامەڤانیدا گوتبووی، دەیەوێت لە سەد وەک یەکەم ئەزموونی راهێنەرایەتی کاربکات، بۆ ئەوەی بەتەواوی شارەزای کارەکە ببێت و دوای ئەوەش بگەڕێتەوە ئەوروپا و بەدیارییکراویش ببێتە راهێنەری بارسێلۆنا.