عەدنان درجال: ئابڵۆقەی سەر یاریگەکانی عێراق هەڵگیرا و سەرۆکی فیفا دێتە عێراق

 

 

عەدنان درجال لە کۆنگرەیەکی رۆژنامەڤانیدا کە راستەوخۆ لە پەیجی رووداو سپۆرت گواسترایەوە گوتی " ئابڵۆقەی وەرزشی بۆ بەڕێوەچوونی یارییە نێودەوڵەتییەکان لە بەغدا لەسەر عێراق هەڵگیرا و یاریی ئێمە و ئیماراتیش لە پاڵاوتنەکانی مۆندیالدا لە بەغدا دەکرێت."

 

سەرۆکی یەکێتیی تۆپی پێی عێراق دەڵێت " لە ماوەی رابردوو پەیوەندیی زۆرباشمان لەگەڵ سەرۆکی یەکێتییەکانی کەنداو و فیدراسیۆنی تۆپی پێی جیهان هەبووە، وڵاتانی کەنداو هاوکاریی زۆریان کردین و پاڵپشتیان کردین بۆ هەڵگرتنی ئابڵۆقەی سەر یاریگەکانی عێراق، بۆ ئەوەش سوپاسیان دەکەین."

 

لە وەڵامی پرسیاری رۆژنامەڤانێکدا کە ئایا هیچ مەرجێکی پێشوەختە خراوەتە بەردەم عێراق؟ سەرۆکی یەکێتیی تۆپی پێی عێراق گوتی " هیچ مەرجێک نەخراوەتە بەردەم عێراق، بەڵام ئێمە لە قۆناخێکی نوێداین و پێویستیمان بە گۆڕانکاریی زۆر هەیە و دەبێت بەباشترین شێوە لە هەموو روویەکەوە یاریی عێراق و ئیمارات بەڕێوەببەین."

 

عەدنان درجال زیاتر گوتی " کاتێک یاریگەی مەدینەمان لە بەغدا کردەوە، فیفا لە ماوەیەکی زۆر کەمدا رەزامەندیی پێداین بۆ ئەوەی یاریی عێراق و ئوگەندا لەو یاریگەیە بکرێت، دوای ئەوەش پێشانی هەموو لایەکماندا کە پێویستە ئابڵوقەی سەر یاریگەکانی عێراق هەڵبگیرێت، بۆ ئەوەش لە پەیوەندی بەردەوامدابووین لەگەڵ فیفا و ئێستا بەغدا ئامادەیە بۆ بەڕێوەبردنی یارییەکان."

 

وەزیری لاوان و وەرزشی عێراق بە رۆژنامەڤانانی گوت " رۆژی 24-3-2022 یاریی عێراق و ئیمارات لە یاریگەی مەدینە لە بەغدا بەڕێوەدەچێت، بۆ ئەوەش داوامان لە جیانی ئینفانتینۆ، سەرۆکی فیدراسیۆنی تۆپی پێی جیهان کردووە، بۆ ئەوەی لە یارییەکەدا ئامادەبێت و دڵنیام ئامادەدەبێت."

 

عێراق لە قۆناخی کۆتایی پاڵاوتنەکانی مۆندیالدا لە کۆمەڵەی یەکەمدا یارییدەکات، تەنیا دوو یاریی ماوە، یەکێکیان بەرامبەر ئیماراتە و ئەوەی دیکەشیان بەرامبەر سوریایە و هەڵبژاردەکە هیوایەکی کەمی بەسەرکەوتن وەک سێیەمی کۆمەڵەکە بۆ پاشکۆی پاڵاوتنەکان ماوە.

 

عێراق لە 8 یاریی رابردوودا هیچ بردنەوەیەکی نەبووە، 5 یەکسانبوون و 3 دۆڕانی هەبووە و بە 5 خاڵ لە پلەی پێنجەمی ریزبەندی کۆمەڵەی یەکەمە.