رووداو دیجیتاڵ
پێپ گواردیۆلا، راهێنەری یانەی مانچێستەر سیتی ئینگلیزی، پێیوایە تیپەکەی یارییەکی باشی بەرامبەر لێستەر سیتی کردووە و دووپاتی دەکاتەوە کە 3 جار هەژاندنی تۆڕی گۆڵەکەی لە لایەن لێستەر سیتییەوە هەرگیز تووشی بێئومێدی نەکردووە.
لە بۆکسینگ دەیدا، مانچێستەر سیتی لەسەر یاریگەی خۆیدا میوانداری لێستەر سیتی کرد و یارییەکەی بە ئەنجامی 6-3 لێیبردەوە و شوێنپێی خۆی لە پێشەنگی ریزبەندیی پرێمەرلیگدا قاییمتر کرد، کە بە کۆکردنەوەی 47 خاڵ پلەی یەکەمی گرتووە.
لە کۆنگرەی رۆژنامەڤانی دوای یارییەکە، پێپ قسەی بۆ رۆژنامەڤانان کرد و بەلایەوە ئاسایی بوو کە 9 گۆڵ لەو یارییەدا تۆمارکراون و گوتی "ئەمە سروشتی یارییەکانی بۆکسینگ دەیە، لە نیوەی یەکەمدا ئاستێکی جیاوازمان پێشکەش کرد و لە نیوەی دووەمیشدا باشبووین".
راهێنەرە ئیسپانییەکەی سیتیزن، زیاتر گوتی "دوای ئەوەی لە نیوەی یەکەمدا 4 بە هیچ پێشکەوتین، لێستەر سیتی لە سەرەتای نیوەی دووەمدا سزای داین و 3 گۆڵیان بەسەریەکەوە کرد، وادیارە ئەوان شێوازی یارییەکەیان گۆڕی بوو، پلانی بەرگریکردن لەدواوەیان پەیڕەوکرد".
ئەو لە بەردەوامی لێدوانەکەیدا، دووپاتیکردەوە "نەماندەزانی ئەوان لە سەرەتای نیوەی دووەمدا هەوڵ بۆ پاراستنی گۆڵەکەیان دەدەن و پشت بە هێرشی هەڵگەڕاوە دەبەستن، بەڵام ئێمەش پشتمان بە تۆپە جێگیرەکان بەست و لە نیوەی دووەمدا سوودمان لێوەرگرت".
گواردیۆلا لە وەڵامی پرسیارێکدا سەبارەت بە هێڵی بەرگریی یانەکەی، کە لەو یارییەدا 3 گۆڵیان لێکرا؟ گوتی "لەبارەی هیڵی بەرگرییەکەمەوە هەستم بە بێئومێدی نەکرد، چونکە لێستەر سیتی تیپێکی خاوەن کوالێتی بەرزە و دەتوانێت گۆڵ بکات، بەڵام پێویستە لەسەرمان بە درێژایی 90 خولەک بە توندی و شەڕانگێزی یاری بکەین".
ئەو لەبارەی رۆبن دیازیشەوە قسەی کرد و گوتی "دیاز بە توندی یاری نەدەکرد، چونکە دەبووایە بەو شێوەیە بێت، ئەو کارتێکی زەردی مابوو بۆ ئەوەی دەربکرێت، بۆیە پێویست بوو وریا بێت".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ