ئەمشەو کاراباو کەپ بە یاریی بەهێز دەچێتە قۆناخی چوارەم

 

لە رۆژی دووەمی بەڕێوەچوونی یارییەکانی قۆناخی سێیەمی جامی کاراباو، چەند یارییەکی بەهێز بەڕێوەدەچن و ئەو یانانە یەکلادەبنەوە کە دەگەنە قۆناخی هەشتی پاڵەوانێتییەکە.

 

کاژێر 21:45 زۆرینەی یارییەکان لە یەککاتدا دەکرێن، یانەی چێڵسی لە یاریگەی خۆیدا و لە بارودۆخێکی ئاڵۆز و خراپدا میوانداریی یانەی برایتن دەکات، پێدەچێت هەردوو یانە بۆ یارییەکە گۆڕانکاریی زۆر لە پێکهاتەکانیاندا بکەن، بەڵام لەگەڵ ئەوەشدا چاویان لە گەیشتن بە قۆناخی داهاتووی پاڵەوانێتییەکە دەبێت.

 

لە هەمان کاتدا، هەردوو یانەی ئارسیناڵ و برێنتفۆرد لە یاریگەی ئەمەی دووەمیان رووبەڕووی یەکدەبنەوە و لیڤەرپوولیش لە ئانفێڵد میوانداریی یانەی لێستەر سیتی دەکات.

 

ئاستۆن ڤێلا و ئێڤێرتۆن لە ڤێلا پارک رووبەڕووی یەکدەبنەوە، فولهام میوانداریی نۆرویچ سیتی دەکات و وێستهام دەبێتە میوانی لینکۆلن سیتی.

 

دوایین یاریی ئەمشەو یارییەکی بەهێز و سەرنجڕاکێش دەبێت، کاتێک کاژێر 22:00 هەردوو یانەی نیوکاسڵ یونایتد و مانچێستەر سیتی لە یاریگەی سانت جەیمس پارک رووبەڕووی یەکدەبنەوە، بەر لە یارییەکە پێپ گواردیۆلا رایگەیاندووە کە گۆڕانکاری لە پێکهاتەکەیدا دەکات و هەلی یارییکردن دەداتە ئەو یاریزانانەی کە پێویستیان بە خولەکی زیاتر هەیە بۆ یارییکردن.

 

نیوکاسڵ لە کاتێکدا میوانداریی مان سیتی دەکات، لە دوایین یاریی پرێمەرلیگدا بە 8-0 لە یانەی شیفڵد یونایتدی بردەوە و مانچێستەر سیتی بە سێ گۆڵ بەرامبەر گۆڵێک سەرکەوتنی بەرامبەر یانەی نۆتینگهام فۆرێست بەدەستهێنا.