ڤیدیۆ؛ لازیۆ بە 3 گۆڵ 3 خاڵ و پێشەنگی لە ئینتەرمیلان وەرگرت

 

لازیۆ لەسەر یاریگەی ئۆڵیمپیکۆ لە رۆمای پایتەخت، میوانداری ئینتەرمیلانی کرد و سەرکەوتنێکی گرنگی بەسەردا بەدەستهێنا و 3-1 لێیبردەوە.

 

گۆڵەکانی لازیۆ لەلایەن فیلیپی ئەندەرسۆنەوە دەستیانپێکرد، کاتێک لە خولەکی 40 توانی تۆڕی گۆڵی ئینتەر بهەژێنێت و نیوەی یەکەم بە پێشکەوتنی خاوەن ماڵ بە گۆڵێک کۆتاییهات.

 

لە نیوەی دووەمدا، لاوتارۆ مارتینێزی هێرشبەری ئەرجەنتینی پێویستی بە تەنیا 6 خولەک بوو بۆ یەکسانکردنەوەی ئەنجامی یارییەکە بۆ بەرژەوەندی ئینتەرمیلان.

 

لە کاتێکدا هەردوو یانە بەدوای گۆڵی دووەمدا دەگەڕان، لویس ئەلبێرتۆ لە خولەکی 75 لازیۆی پێشخست و تۆڕی ئینەرمیلانی هەژاند، تاوەکو پێدرۆش 4 خولەک بەر لە فیکەی کۆتایی یارییەکە گۆڵی سێیەم و دڵنیابوونی بۆ یانەکەی پایتەخت تۆمارکرد و 3 خاڵی یارییەکە بوونە بەشی لازیۆ. 

 

بەم سەرکەوتنە، لازیۆ ژمارەی خاڵەکانی بۆ 7 خاڵ بەرزکردەوە و بەشێوەیەکی کاتی گەیشتە پێشەنگی ریزبەندیی خولەکە، ئینتەرمیلانیش بە 6 خاڵ لە پلەی سێیەمدایە.