ڤیدیۆ؛ عەلی عەدنان و تیپەکەی دەرکران

رووداو دیجیتاڵ

عەلی عەدنان، ئەستێرەی هەڵبژاردەی عێراق ماڵئاوایی لە خولی یانەکانی ئەمریکا کرد، دوای ئەوەی یانەی ڤانکۆڤەر وایتکاپس بەلێدانەکانی یەکلاییکەرەوە بەرامبەر سپۆرتینگ کانساس سیتی دۆڕا.

لەو یارییەدا کە بەرەبەیانی ئەمڕۆ، لە رکابەرییەکانی قۆناخی شازدەی خولی ئێم ئێل ئێسی ئەمریکا بەڕێوەچوو، هەردوو یانە لەکاتی ئاساییدا هیچ گۆڵێکیان تۆمارنەکرد و یارییەکە بەبێ گۆڵ کۆتاییهات، بەمەش هەردوولا روویانکردە لێدانەکانی یەکلاییکەرەوە، لە لێدانەکانی یەکلاییکەرەوەدا، یانەی سپۆرتینگ کانساس، بە 3-1 سەرکەوتنی بەدەستهێنا و خۆی گەیاندە قۆناخی هەشتی خولەکە.

لە یارییەکەدا عەلی عەدنان بەشێوەی سەرەکی یارییکرد، بەڵام هیچ یەکێک لە لێدانەکانی یەکلاییکەرەوەی جێبەجێنەکرد، سەرەرای ئەوەی لە یارییەکەدا ئاستێکی بەرزی پێشکێشکرد و 7 خاڵی پێدرا.

عەلی عەدنان لەم وەرزەی خولی ئەمریکادا بەشداریی لە 5 یارییدا کردووە، گۆڵێکی تۆمارکردووە و دوو ئاسیستی هەبوو، وەرزی رابردووش یاریزانەکە لە 28 یارییدا گۆڵێکی تۆمارکرد و 5 ئاسیستی هەبوو.