ئەمرابت بەهۆی مێسییەوە نەچووە بارسێلۆنا

 

ئەمرابت لە دوایین زستانی مێرکاتۆ و سەرەتای ئەم هاوینەدا ئامانجێکی سەرەکی چاڤی هێرناندێزی راهێنەری یانەی بارسێلۆنا بوو، بەڵام دواتر بە هۆکارێکی نادیار بارسا پاشەکشەی لەو گرێبەستە کرد.

 

بەگوێرەی رۆژنامەکانی ئیسپانیا، چاڤی گرێبەستەکەی ئەمرابتی لەگەڵ گرێبەستی لیۆنێل مێسی ئەستێرەی پێشووی یانەی پاریس سانجێرمانی فەرەنسی بەستبووەوە، داینابوو ئەگەر مێسی بگەڕێتەوە گرێبەست لەگەڵ سوفیانیش بکات، چونکە بەنیازی ئەوە بووە شێوازی یاریکردنی تیپەکەی بگۆڕێت بۆ 4-1-2-1-2.

 

وەک ئەو سەرچاوانە باسی دەکەن، چاڤی پلانی دانابوو مێسی بخاتە دواوەی هێرشبەرانەوە، هەر بۆیە پێویستی بە یاریزانێک بوو کە تایبەتمەندی و توانایەکی جەستەیی هاوشێوەی ئەمرابتی هەبێت بۆ ئەوەی هاوسەنگی تیپەکە لە هێڵی ناوەڕاستدا بپارێزێت.

 

ئەو سەرچاوانە دەڵێن "شکستی گرێبەستەکەی مێسی کە رووی لە یانەی ئینتەرمەیامی ئەمریکی کرد، وایکرد بارسێلۆنا بەدوای یاریزانێکی لێهاتوودا بگەڕێت کە بتوانێت تۆپەکە کۆنتڕۆڵ بکات، بۆیە چاڤی رووی لە ئیلکای گوندۆگانی یاریزانی ئەڵمانیی یانەی مانچێستەر سیتی کرد، بەتایبەتی کە بە گرێبەستێکی ئازادەوە هاتە بارسا".

 

ئێستا ناوی سوفیان ئەمرابت بەستراوەتەوە بە گواستنەوە بۆ ریزەکانی یانەی ئاتلێتیکۆ مەدریدی ئیسپانی یان میلانی ئیتاڵی.