Getty Images/AFP
رووداو دیجیتاڵ
یانەی کۆلۆرادۆ ئاڤالانچ نازناوی جامی ستانلی لە هۆکی سەر شەختەی ئەمریکای بەدەستهێنا، دوای ئەوەی لە یاریی شەشەمی یەکلاکەرەوەدا لە یانەی تامپا بەی لایتنینگ پاڵەوانی دوو ساڵی رابردووی بردەوە و ئەنجامەکەی کردە 4-2 یاری.
تامپا بەی لایتنینگ کە رۆژی یەکشەممە میوانداری شەشەمین یاری نێوان هەردوو یانەکەی کرد لە یاری کۆتایی جامەکەدا، یارییەکەیان بە باشی دەستپێکرد و لە گێمی یەکەمدا بە گۆڵێکی ستیڤن ستامکۆس پێشکەوت.
یاریزانانی کۆلۆرادۆ کە بە سێ یاری پێش یارییەکەی یەکشەممە بەرامبەر بە دوو یاری بۆ پێش تامپا بەی بوون، چاوەڕێی گێمی دووەمیان کرد و هەر زوو ناتان مەکینۆن بە تۆمارکردنی گۆڵێک ئەنجامەکەی یەکسانکردەوە، دواتر ئارتوری لیکۆنن گۆڵێکی دیکەشی تۆمارکرد و کۆلۆرادۆی بە گۆڵێک پێشخست.
سەرەڕای هەوڵە بەهێزەکانی تامپا بەی لە کۆتایی گێمی دووەم و لە گێمی سێیەمیشداح یاریزانەکانی نەیاتوانی گۆڵی یەکسانبوون بەدەستبێنن و یارییەکە بە بردنەوەی یانەی کۆلۆرادۆ ئاڤالانچ بە دوو گۆڵ بەرامبەر گۆڵێک کۆتایی هات و نازناوەکە بووە بەشی کۆلۆرادۆ.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ