رووداو دیجیتال
ئەمڕۆ یەکشەممە لە گەڕی 33ـی خولی یانە نایابەکانی عێراق یانەی هەولێر کاژێر 21:30 لەنێو یاریگەی فڕانسۆ هەریری میوانداری یانە جەوییە دەکات.
یانەی هەولێر لەم یارییەدا هیوای سەرکەوتن و بەدەستهێنانی 3 خاڵی یارییەکەی هەیە، لەبەرئەوەی تیپەکە 36 خاڵی هەیە و لە پلەی چواردەمی ریزبەندییە.
تەها قادر، راهێنەری یانەی هەولێر، لە لێدوانێکی تایبەت بە تۆڕیی میدیایی رووداو، رایگەیاند "کارمان لەسەر بەرزکردنەوەی موڕاڵی یاریزانان و هێورکردنەوەی دەروونیان کردووە، هەروەها کارمان لەسەر شێوازێکی تایبەتی یاریکردن کردووە لەسەر خاڵە بەهێز و لاوازەکانی یانەی جەوییە، ئەگەر ئەوان چەند بەهێزبن ئێمە بۆ سەرکەوتن یاریدەکەین".
یانەی جەوییە وەرزی ئەمساڵ ئاستێکی بەرزی پێشکەشکردووە و بە کۆکردنەوەی 72 خاڵ لە پێشەنگی ریزبەندیی خولی نایابی عێراقە، تیپەکە ماوەی سێ رۆژە راهێنانەکانی لە شاری هەولێر ئەنجامدەدات و تینووی سەرکەوتنێکی دیکەیە.
هەیسەم کازم، بەڕێوەبەری تیپی تۆپی پێی یانەی جەوییە، بۆ رووداو، روونیکردەوە "ئێمە دەمانەوێت بەردەوامبین لە سەرکەوتنەکان و دڵخۆشکردنی هاندەرانمان، یانەی هەولێر ناوێکی گەورەیە لەسەر ئاستی عێراق، دەزانین یارییەکە قورسە، بەڵام ئامادەین بۆ بردنەوەی یارییەکی دیکە".
یانەی هەولێر خاوەن چوار نازناوی خولی یانە نایابەکانی عێراقە و دووجار گەیشتووەتە یاری کۆتایی جامی یەکێتیی یانەکانی ئاسیا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ