پەیامی ئێندریک، دوای ئەو گۆڵەی لە بێرنابیۆ تۆماریکرد

 

 

دوای ئەوەی هەردوو هەڵبژاردەی ئیسپانیا و بەرازیل، لە سانتیاگۆ بێرنابیۆ یەکسانبوون و ئێندریک گۆڵێکی تۆمارکرد، یاریزانەکە قسەی بۆ رۆژنامەی موندۆ دیپۆرتیڤۆ کردووە و دەڵێت "خەونم بەوەوە دەبینی گۆڵی یەکەمم لە بێرنابیۆ تۆماربکەم، لێرە کەس لە کەس باشتر نییە."

 

یاریزانە لاوە بەرازیلییەکە زیاتر گوتی "بۆ ئەم دوو گۆڵەی تۆمارمکردن قەرزاری هاوڕێکانمم، هەروەها قەرزاری دۆریڤالم کە ئەو متمانەیەی پێبەخشیم."

 

لە بەشێکی دیکەی قسەکانیدا هێرشبەری داهاتووی یانەی ریال مەدرید دەڵێت "زۆر دڵخۆشم بەوەی لە ژیانمدا روودەدات، پێزانینی زۆرم بۆی هەیە."

 

ئێندریک، یاریزانێکی لاوی بەرازیلییە و تەمەنی تەنیا 17 ساڵە و یاریزانێکی بەتوانایە، یانەی ریال مەدرید پێشتر گرێبەستێکی بەرامبەر 70 ملیۆن یۆرۆ لەگەڵ یاریزانەکە واژۆکردووە، بەڵام تاوەکو هاوینی داهاتوو بەخواستن لە پالمێراسی بەرازیلی ماوەتەوە.

 

لە ماوەی رابردوودا دەنگۆی زۆر لەبارەی ئەگەر مانەوەی یاریزانەکە لە یانە بەرازیلییەکە بڵاوبوونەوە، بەڵام ریال مەدرید بەوە رازی نییە و هەر بیریشی لێنکاتەوە، دەیەوێت لە هاویندا ئەو یاریزانە پەیوەندی بە تیپەکەوە بکات و بۆ قۆناخی ئامادەکارییەکان لەگەڵ پێکهاتەی کارلۆ ئەنچێلۆتی بێت.

 

هەڵبژاردەی بەرازیل لەم هەفتەیەدا دوو یاریی دۆستانەی بەرامبەر ئینگلتەرا و ئیسپانیا ئەنجامدا، لە هەردوو یارییەکەدا ئێندریک گۆڵی تۆمارکرد، ئەمەش کاردانەوەیەکی زۆری دروستکرد و یاریزانەکەی لەلای هاندەرانی ریال مەدرید و بەرازیل خۆشەویستتر کرد.