رووداو دیجیتاڵ
خوان لاپۆرتا، سەرۆکی یانەی بارسێلۆنا پێشوازی لە شاندێکی حکومەتی هەرێمی کوردستان دەکات و شاندەکە لە نزیکەوە چاوی بە مێژوو و دەستکەوتەکانی ئەو یانەیە کەوت.
شەوی یەکشەممە لە رکابەرییەکانی گەڕی 21ـی لالیگا، شاندێکی دەستەی گەشتوگوزاری وەزارەتی شارەوانی و گەشتوگوزار، بە سەرۆکایەتیی ئەمەل جەلال، سەرۆکی دەستەی گەشتوگوزار لەسەر بانگهێشتنامەی فەرمی خوان لاپۆرتا، سەرۆکی یانەی بارسێلۆنا ئامادەی یاریی نێوان هەردوو یانەی بارسێلۆنا و ڤالێنسیا بوون، کە بارسێلۆنا یارییەکەی بە 7-1 بردەوە.
شاندەکەی وەزارەتی شارەوانی و گەشتوگوزاری حکومەتی هەرێمی کوردستان، لە نزیکەوە بەنێو یاریگەی مونتجویکدا گەڕان کە یانەی بارسێلۆنا یارییەکانی تێیدا ئەنجامدەدات، مۆزەخانەی تایبەتی یانەکەیان بەسەرکردەوە و لەنێو یاریگەدا بینەری یاریی نێوان هەردوو یانە بوو.
لە کۆبوونەوەی نێوان شاندی دەستەی گەشتوگوزاری حکومەتی هەرێمی کوردستان و خوان لاپۆرتا، سەرۆکی یانەی بارسێلۆنا، دارەوان حاجی حامید، نوێنەری حکومەتی هەرێمی کوردستان لە ئیسپانیاش ئامادەبوو و هەردوولا بە گرنگییەوە باسیان لە گەشتوگوزاری وەرزشی یەکێک و بە یەکێک لە جۆرە کاریگەرەکانی گەشتوگوزار ناویان برد و ئاماژەیان بۆ ئەوە کرد، هەرێمی کوردستان دەتوانێت بە سوود وەرگرتن لە ئەزموونی سەرکەوتووی ئیسپانیا، پەرە بە گەشتوگوزاری وەرزشی بدات.
شاندێکی دەستەی گەشتوگوزاری وەزارەتی شارەوانی و گەشتوگوزاری حکومەتی هەرێمی کوردستان بۆ بەشداریکردن لە پێشانگەی گەشتیاری (FITUR) لە مەدریدن و لەو چوارچێوەیەشدا بۆ ئامادەبوون لە یاریی بارسێلۆنا و ڤالێنسیا، چوونەتە یاریگەی یانە کەتەلۆنییەکە و ئامادەی ئەو یارییە بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ