یاریگەی ریڤەرپلەیت
رووداو دیجیتاڵ
یاریگەی مۆنۆمێنتالە، وەک هەمیشە ئامادەیە و سوور و سپی هەموو یاریگەی داپۆشیووە، یارییەکە سوپەر کلاسیکۆی نێوان ریڤەرپلەیت و بۆکا جونیۆرزە، لە رکابەرییەکانی گەڕی حەوتەمی خولی ئەرجەنتین.
مارتن دیمیکێلس و دیێگۆ مارتینێز بە باوەشکردن بە یەکدیدا دەچنە نێو رکابەرییەکە.
خاوەن یاریگە بە هێرشبردن دەستیپێکرد و هاندەران چاوەڕێی هەژاندنی تۆڕن، فاکوندۆ کۆیدیۆ لێدانێکی ئاراستەی گۆڵ کرد، بەڵام ستوون رێگەی نەدا تۆڕی بۆکا بهەژێنرێت و نیوەی یەکەم تەنیا ئەو هێرشەی بەخۆیەوە بینی.
لە سەرەتای نیوەی دووەمدا، پابلۆ سۆلاری دوای دوو لێدانی بەدوای یەکدا تۆڕی سێرجیۆ رۆمێرۆی هەژاند و گۆڵی پێشکەوتنی بۆ ریڤەرپلەیتی خاوەن یاریگە تۆمارکرد و ئاهەنگێکی گەورەی خستە نێو یاریگە و هاندەران.
لە خولەکی 70 کریستیان مێدینا بەلێدانێکی بەهێز ئەنجامەکەی بۆ بۆکا جونیۆرز یەکسانکردەوە و یارییەکەی گەڕاندەوە خاڵی سەرەتا.
خاوەن یاریگە هەوڵی زۆری دەدا، ئەنجامەکە بگۆڕێت و گۆڵی دووەم تۆماربکات، بەڵام رۆمێرۆ لەبەردەم هەموو هێرشەکان وەستایەوە و رێگەی نەدا بۆ جاری دووەم تۆڕی گۆڵەکەی بهەژێنرێت.
یارییەکە بەیەکسانبوون بە گۆڵێک بۆ هەرلایەک کۆتاییهات، هەردوو راهێنەر هاوشێوەی سەرەتا باوەشیان بەیەکدیدا کرد و بە پێکەنینەوە یاریگەیان بەجێهێشت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ