رووداو دیجیتاڵ
یانیک سینێر، ئەستێرەی ئیتاڵی نازناوێکی دیکەی گراندسلامی بردەوە و یەکەم نازناوی پاڵەوانێتی گەورەی لە ساڵی 2025 بردەوە، دوای ئەوەی بووە پاڵەوانی پاڵەوانێتی کراوەی ئوسترالیا.
لە یاریی کۆتایی پاڵەوانێتییەکەدا، یانیک سینێری ئیتاڵی و یەکەمی ریزبەندی باشترین تێنسزانەکانی جیهان بەرامبەر ئەلیکساندەر زڤێرێڤی ئەڵمانی و دووەمی ریزبەندی باشترین تێنسزانەکان یارییکرد و یارییەکەی بە سێ کۆمەڵەی بێبەرامبەر بردەوە.
لە سەرەتای یارییەکەدا سینێر بەهێزەوە چووە نێو رکابەرییەکە و بە کەمتر لە کاژێرێک بە شەش چوار ئەو کۆمەڵەیەی بردەوە.
لە کۆمەڵەی دووەمدا، رکابەرییەکە گەیشتە لووتکە و تێنسزانە ئەڵمانییەکە ئاستێکی بەرزی پێشکێشکرد و هەوڵی زۆریدا بۆ گەڕانەوە بۆ نێو رکابەرییەکە و یارییەکەی بردە تای برێک، بەڵام لەو کۆمەڵەیەشدا بە حەوت شەش دۆڕا و سینێر بووە خاوەنی دوو کۆمەڵە لە یارییەکەدا.
دوای ئەوە ئاستی زڤێرێڤ دابەزی و یانیک سینێر، کۆمەڵەی سێیەمی بە شەش سێ بردەوە و لە دوای 2 کاژێر و 42 خولەک رکابەریکردن نازناوی پاڵەوانێتییەکەی بردەوە.
ئەمە ساڵی دووەمە لەسەریەک یانیک سینێر، نازناوی پاڵەوانێتی کراوەی تێنسی ئوسترالیا دەباتەوە و چوارەم نازناوی گراندسلامە تێنسزانە 23 ساڵە ئیتاڵییەکە بەدەستیدەهێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ