مارکۆ رۆیس
رووداو دیجیتاڵ
مارکۆ رۆیس، ئەستێرەی بەنێوبانگی ئەڵمانی، یەکەم یاریی بەدرێسی یانەی لۆس ئانجلێس گالاکسی ئەمریکییەوە ئەنجامدا و سەرکردایەتیی یانەکەی کرد بۆ بردنەوە لە ئاتالانتا یونایتد.
یارییەکە بەرەبەیانی ئەمڕۆ بەڕێوەچوو، لۆس ئانجلێس بە دوو گۆڵی بێبەرامبەر سەرکەوتنی بەدەستهێنا.
لە خولەکی 75 مارکۆ رۆیس ئاسیستێکی کرد و ریکی پۆیگ، یاریزانی پێشووی یانەی بارسێلۆنا گۆڵی یەکەمی لۆس ئانجلێسی تۆمارکرد.
هێرشەکانی یانەی لۆس ئانجلێس بەردەوامبوون، لە خولەکی 84 مارکۆ رۆیس یەکەم گۆڵی خۆی بەدرێسی یانەکەوە و لە خولی ئەمریکادا تۆمارکرد، لۆس ئانجلێس بووە خاوەنی دوو گۆڵ.
یارییەکە بە دوو گۆڵی بێبەرامبەر لە بەرژەوەندی یانەی لۆس ئانجلێس گالاکسی کۆتاییدا، ئەمە چوارەم بردنەوەی یانەکەیە لە دوایین 5 یارییدا و ئێستا لە بەشی رۆژئاوای خولی ئەمریکا، یانەکە لە پلەی یەکەمی ریزبەندە و خاوەنی 52 خاڵە.
مارکۆ رۆیس، ئەستێرەی بەنێوبانگی ئەڵمانی، دوای 11 ساڵ یارییکردن بۆ یانەی بۆرووسیا دۆرتموند، لەگەڵ کۆتاییهاتنی وەرزی رابردوو ماڵئاوایی لە یانەکە کرد و روویکردە خولی ئەمریکا.
پێشتر لە بارەی پەیوەندیکردنی بە یانەی لۆس ئانجلێس گالاکسییەوە، رۆیس رایگەیاند، یانەکە خاوەنی پڕۆژەیەکی گەورەیە و ئامانجیان بەدەستهێنانی ئەنجامی باش و بردنەوەی نازناوەکانە، ئەویش بۆ بەرەوپێشبردنی ئەو پڕۆژەیە روویکردووەتەوە یانەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ