ڤیدیۆ؛ سپۆرتینگ بۆ جاری 21ـەمین بووە پاڵەوانی پۆرتوگال
رووداو - هەولێر
یانەی سپۆرتینگ لیشبۆنە، دوای چوار ساڵ جارێکی دیکە نازناوی جامی پۆرتوگالی بردەوە، دوای ئەوەی بەلێدانەکانی یەکلاییکەرەوە سەرکەوتنی بەسەر پۆرتۆ بەدەستهێنا.
هەردوو یانە لەسەر یاریگەی نیشتمانی لە ئۆیراس رووبەڕووی یەکبوونەوە، سەرەتا لە خولەکی 41 فرانسیسکۆ سوارێز گۆڵێکی بۆ پۆرتۆ تۆمارکرد، بەڵام دوای چوار خولەک برونۆ فێرناندێز ئەنجامەکەی یەکسانکردەوە.
لە گێمی دووەمدا یاریزانانی هەردوو یانە لە تۆمارکردنی گۆڵ سەرکەوتوو نەبوون، یارییەکە چووە کاتی زیادکراو لە خولەکی 101 باس دۆست گۆڵی دووەمی بۆ سپۆرتینگ تۆمارکرد، لە خولەکی 120 ئاندرێ پێرێرا گۆڵی یەکسانبوونی بۆ پۆرتۆ تۆمارکرد و یارییەکە چووە لێدانەکانی یەکلاییکەرەوە، سپۆرتینگ لیشبۆنە بە 5 لێدان بەرامبەر 4 لێدان سەرکەوتنی بەدەستهێنا و دوای چوار ساڵ نازناوەکەی بردەوە.
بە بردنەوەی ئەم نازناوە سپۆرتینگ لیشبۆنە بووە خاوەنی 21 نازناوی جامی پۆرتوگال و بەجیاوازیی دوو نازناو پێش پۆرتۆ کەوت.