ڤیدیۆ؛ بارسێلۆنا بە 4 گۆڵ لە جامی شا دەرکرا

 

بارسێلۆنا لە قۆناخی چارەکی کۆتایی جامی شای ئیسپانیا، لەسەر یاریگەی سان مامێس، بووە میوانی ئاتلێتیک بیلباو و بە ئەنجامی 2-4 پێیدۆڕا و لە پاڵەوانێتییەکە دەرکرا، دوای ئەوەی یارییەکە گەیشتە دوو گێمی زیادکراو، پاش ئەوەی یارییەکە لە هەردوو گێمی ئاساییدا بە ئەنجامی 2-2 کۆتاییهات.

 

تیپی خاوەن ماڵ دەستپێشخەربوو، و هەر لە یەکەم خولەکدا گۆرکا گۆرۆزیتا تۆڕی گۆڵی بارسای هەژاند.

 

لە خولەکی 26 رۆبێرت لیڤاندۆڤسکی گۆڵی یەکسانبوونەوەی بۆ تیپی میوان تۆمارکرد. دوای 6 خولەک لامین یامال بەشێوەیەکی جوان گۆڵی دووەمی بۆ بارسا تۆمارکرد.

 

نیوەی یەکەم بە پێشکەوتنی یانە کەتەلۆنییەکە بە ئەنجامی 2-1 کوتاییهات، بەڵام بیلباو نیوەی دووەمیشی وەک نیوەی یەکەم بە گۆڵکردن دەستپێکرد، کاتێک ئۆهیان سەنسێت لە خولەکی 49ـدا گۆڵی دووەم و یەکسانکردنەوەی ئەنجامەکەی تۆمارکرد.

 

یارییەکە لە کاتی ئاساییدا دوو بە دوو کۆتاییهات و هەردوو یانەکە پەنایان بردە بەر دوو گێمی زیادکراو، کە تیایاندا تیپی خاوەن یاریگە باڵادەست و سەرکەوتوو بوو، دوای ئەوەی هەردوو برا، ئنیاکی و نیکۆلاس ویلیامز توانییان لە خولەکەکانی 105+2 و 120+1 دوو گۆڵی دیکە بۆ بیلباو تۆماربکەن و یانەکەیان بگەیننە قۆناخی پێشکۆتایی جامی شای ئیسپانیا. بارسێلۆناش ماڵئاوایی لە دووەم پاڵەوانێتی ئەمساڵ کرد، دوای ئەوەی لە سعودیەش یاریی کۆتایی جامی سوپەری ئیسپانیای بە ریال مەدرید دۆڕاند.