رووداو دیجیتاڵ
کاپتنی هەڵبژاردەی چیلی، لە پێشەنگی ریزبەندیی بەتەمەنترین یاریزانەکانی بەشداربووە لە وەشانی 48ـی کۆپا ئەمریکادا. لیۆنێل مێسی ئەستێرەی ئەرجەنتینیش هەشتەم پیرترین یاریزانی ئەو پاڵەوانێتییەیە.
کلاودیۆ براڤۆ، گۆڵپارێزی هەڵبژاردەی چیلی و یانەی ریال بێتیسی ئیسپانی، لە پێشەنگی لیستی بەتەمەنترین یاریزانەکانی کۆپا ئەمریکای 2024 دێت، کە ئێستا لە ویلایەتە یەکگرتووەکانی ئەمریکا بەڕێوەدەچن و لە 14ـی تەمموزی داهاتوو کۆتاییدێت.
بە بەشداریکردنی لە یاریی هەڵبژاردەکەی بەرامبەر پێرو کە رۆژی شەممەی رابردوو بەڕێوەچوو، و بەبێ گۆڵ کۆتاییهات، کلاۆدیۆ براڤۆی گۆڵپارێزی قاڵی چیلی بووە بەتەمەنترین یاریزان لە مێژووی کۆپا ئەمریکادا و بەتەمەنترین یاریزانی ئەم وەشانە، کە لە تەمەنی 41 ساڵ و 69 رۆژیدا یاری کرد.
گۆڵپارێزی ئێستای ریال بێتیس، و گۆڵپارێزی پێشووی یانەی بارسێلۆنا و مانچێستەر سیتی، سەرکردایەتی ئەو یاریزانانەی چیلی کردووە، کە نازناوی کۆپا ئەمریکای 2015 و 2016یان بەدەستهێنا، هاوکات وەک باشترین یاریزانی کۆپا ئەمریکای 2015 دەستنیشانکرا.
هەر هەمان یارییەکەی چیلی و پێرو شاهیدی بەشداریکردنی دووەم بەتەمەنترین یاریزانی پاڵەوانێتییەکە بوو، پاولۆ گێرێرۆی هێرشبەری هەڵبژاردەی پێرو، کە لە خولەکی 70ـی یارییەکەدا وەک یاریزانی یەدەگ چووە نێو یاریگا و ناوی خۆی وەک دووەم بەتەمەنترین یاریزان لە یارییەکەدا و لە مێژووی پاڵەوانێتییەکەدا، لە دوای براڤۆ تۆمارکرد.
گێرێرۆ تەمەنی 40 ساڵ و 5 مانگە، بەمەش دەبێتە دووەم پیرترین یاریزان کە بەشداری لە کۆپا ئەمریکای 2024ـدا کردووە.
پێشەنگی 10 یاریزانە بەتەمەنەکانی پاڵەوانێتییەکە، کە ئەمریکا میوانداری دەکات، بە بەشداری 16 تیپ، ئامادەبوونی ئەفسانەی هەڵبژاردەی ئەرجەنتینی و پاڵەوانی مۆندیالی 2022 لیۆنێل مێسی بەخۆیەوە دەبینێت، کە کە لە تەمەنی 36 ساڵ و 11 مانگ 27 رۆژیدا ایری کرد و پلەی هەشتەمی ریزبەندییەکەی گرتووە، لە کاتێکدا ئەمڕۆ تەمەنی بوو بە 37 ساڵ.
ئەمە لە کاتێکدایە کە لویس سوارێزی هاوڕێی لیۆنێل مێسی لە ئینتەرمەیامی پلەی چوارەمی ریزبەندییەکەی گرتووە و تەمەنی 37 ساڵ و چوار مانگە.
سوارێز لەسەر کورسی یەدەگەوە سەیری یەکەم یاریی هەڵبژاردەکەی کرد کە بەرامبەر پەنەما بوو، و بە ئەنجامی 3- سەرکەوتنیان بەدەستهێنا.
ئەمە ریزبەندیی 10 بەتەمەنترین یاریزانەکانی کۆپا ئەمریکای 2024ـە:
1- کلۆدیۆ براڤۆ (چیلی)، 41 ساڵ و دوو مانگ
2- پاولۆ گێرێرۆ (پێرو)، 40 ساڵ و پێنج مانگ
3- فرانکۆ ئارمانی (ئەرجەنتین)، 37 ساڵ و 8 مانگ
4- لویس سوارێز (ئۆرۆگوای)، 37 ساڵ و چوار مانگ
5- کارلۆس لامبی (بۆلیڤیا)، 37 ساڵ و سێ مانگ
6- هێرنان گوێندێز (ئیکوادۆر)، تەمەنی 37 ساڵ و دوو مانگ
7- ئەلێکساندەر دۆمینگێز (ئیکوادۆر)، تەمەنی 37 ساڵە
8- لیۆنێل مێسی (ئەرجەنتین)، 36 ساڵ و 11 مانگ (بوو بە 37 ساڵ)
9- گابرێل ئاریاس (چیلی)، 36 ساڵ و 9 مانگ
10- تیم ریام (ئەمریکا)، 36 ساڵ و 8 مانگ
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ