بەشێک لە یارییەکانی لالیگا لە دەرەوەی ئیسپانیا بەڕێوەدەچن

 

 

لە چەند ساڵی رابردوودا، چەندین یانەی ئیسپانی بەتایبەتی بارسێلۆنا و ریال مەدرید ئارەزووی خۆیان بۆ ئەنجامدانی بەشێک لە یارییەکانیان لە دەرەوەی ئیسپانیا پێشانداوە، تەنانەت لە ساڵی 2018، بارسێلۆنا داوای کرد کە یارییەکەی ئەو وەرزەی بەرامبەر جیرۆنا لە شاری مەیامی لە ویلایەتە یەکگرتووەکانی ئەمریکا ئەنجامبدات، بەڵام دواتر فیفا و یەکێتی تۆپی پێی ئەمریکا رەتیان کردەوە رێگە بە ئەنجامدانی کارێکی لەو شێوەیە بدەن. دوابەدوای ئەو رووداوە، کۆمپانیای رێلێڤانتی ئەمریکی کە رێکخەری یارییەکە بوو، سکاڵای یاسایی لەسەر هەردوو لایەن تۆمارکرد. 

 

بەپێی هەواڵەکان، لە سەرەتای ئەم مانگەدا ناکۆکییەکانی نێوان فیفا و رێلێڤانت چارەسەرکران، ئەمەش ئەگەری ئەنجامدانی بەشێک لە یارییەکانی لالیگا لە وڵاتانی دەرەوەی ئیسپانیا زیاتر دەکات. لەوبارەیەوە خاڤیێر تێباسی سەرۆکی لالیگا دەڵێت "لە داهاتوودا بەشێک لە یارییەکانی لالیگا لە دەرەوەی ئیسپانیا بەڕێوەدەچن، بەتەواوی نازانم ئەوە کەی روودەدات، بەڵام پێموایە لە وەرزی 2025/2026ـەوە دەستپێبکات."

 

سەرۆکی لالیگا زیاتر دەڵێت "ئەنجامدانی یارییەکانی لالیگا لە ویلایەتە یەکگرتووەکانی ئەمریکا دەبێتە هۆی بەهێزکردنی پێگەکەمان لە بازاڕەکانی ئەو وڵاتەدا. خولەکانی دیکەی جیهان لێمان نزیکدەبنەوە، بۆیە ئەگەر ئێمە هەر کارەکانی رابردوو دووبارە بکەینەوە، ئەوا ئەوان لە پێشمان دەدەنەوە."