فلۆریان فیرتز
رووداو دیجیتاڵ
تەنیا یەک گۆڵی بەدرێسی هەڵبژاردەکەیەوە تۆمارکردووە، بەڵام گۆڵەکەی بووە گۆڵێکی مێژوویی و لەبیر نەکراو، ئەو فلۆریان فیرتز، یاریزانی لاوی هەڵبژاردەی ئەڵمانیا و یانەی بایرلیڤەرکوزنە.
فیرتز بەهۆی ئەو ئاستەبەرزەی لەگەڵ یانەی بایرلیڤەرکوزن پێشکێشی دەکات، بۆ هەڵبژاردەی ئەڵمانیا بانگهێشتکراوە و یاریزانەکە لە یاریی دۆستانەی بەرامبەر فەرەنسا، گۆڵێکی مێژوویی و لەبیرنەکراوی تۆمارکرد.
یارییەکە تەنیا 7 چرکەبوو دەستیپێکردبوو، کاتێک فیرتز بە ئاسیستێکی تۆنی کرووس، گۆڵێکی جوان و سەرنجڕاکێشی تۆمارکرد.
گۆڵەکەی ئەو یاریزانە لاوە، دوو ریکۆردی تۆمارکرد، یەکەمیان بووە دووەم خێراترین گۆڵ لە مێژووی تۆپی پێی هەڵبژاردەکانی ئەوروپادا، دوای ئەو گۆڵەی کریستۆف باومگارتنەر، یاریزانی هەڵبژاردەی نەمسا دوای تەنیا 6 چرکە بەرامبەر هەڵبژاردەی سلۆڤاکیا تۆمارکرد.
ریکۆردەکەی دیکەی فلۆریان فیرتز، تایبەتە بە هەڵبژاردەی ئەڵمانیا و ئەو گۆڵە بووە خێراترین گۆڵی لە مێژووی تۆپی پێی هەڵبژاردەکەدا.
فیرتز تەنیا 15 یاریی بۆ مانشافت کردووە و خاوەنی گۆڵێکە، لەگەڵ بایرلیڤەرکوزن ئاستێکی بەرز پێشکێشدەکات و یەکێکە لەو یاریزانانەی ریال مەدرید کار بۆ گواستنەوەی دەکات و چاودێریی دەکات.
یاریزانە ئەڵمانییەکە لەبارەی داهاتووی خۆیەوە دەڵێت "لەم رۆژانەدا سەرنجم لەسەر هەڵبژاردەی ئەڵمانیایە، بەڵام پلانی زۆرم لەگەڵ بایرلیڤەرکوزن هەیە."
فیرتز زیاتر گوتی "نازانم چابی ئەڵۆنسۆ بەنیازی چییە و چی دەکات، بەڵام پلانەکەم روونە."
فلۆریان فیرتز تەمەنی 20 ساڵە، گرێبەستەکەی لە هاوینی 2027 کۆتاییدێت، ئێستا لە بازاڕی گواستنەوەی یاریزاناندا نرخەکەی دەگاتە 100 ملیۆن یۆرۆ.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ