نوێترین زانیاری لەسەر داهاتووی لیۆنێل مێسی

 

پەیامنێرێکی کەناڵی تەلڤزیۆنی TYC، کە لە مێسی نزیکە، ئاشکرایکرد کە لیۆ دانوستاندنی لەگەڵ هیچ یانەیەکی دیکە نەکردووە، و حەزدەکات گرێبەستەکەی لەگەڵ پاریس سانجێرمان نوێ بکاتەوە.

 

ئاماژەی بەوەشکرد، ئێستا گفتوگۆ لەنێوان مێسی و بەرپرسانی یانە پاریسییەکان بەڕێوەدەچێت بۆ تەواوکردنی کارەکان بە باشترین شێوە.

 

ئەو پەیامنێرە ئەرجەنتینییە، روونیکردەوە کە شێوازی رێککەوتنەکە بۆ مانەوەی مێسی لەگەڵ پاریس سانجێرمان دەمێنێتەوە، چونکە هێشتا دیارنییە کە بڕگەی نوێکردنەوە لە گرێبەستەکەدا چالاکدەکرێتەوە بۆ وەرزێکی دیکە و مانەوە تاوەکو هاوینی 2024، یان  یاریزانەکە گرێبەستێکی نوێ واژۆ دەکات.

 

لە کاژێرەکانی رابردوودا، چەند راپۆرتێکی رۆژنامەڤانی رایانگەیاند، کە مێسی لە بیرۆکەی نوێکردنەوە گرێبەستەکەی لەگەڵ پاریس سانجێرمان کشاوەتەوە دوای ئەوەی مۆندیالی لەگەڵ ئەرجەنتین بردەوە.

 

تەنانەت پێشتر هەندێک لە راپۆرتە رۆژنامەڤانییەکان باسیان لەوە دەکرد کە لیۆنێل مێسی پەیوەستە بە گواستنەوە بۆ یانەکانی دیکەی وەک هیلالی سعودی و ئینتەرمیامیی ئەمریکی.

 

هەروەها هەندێک سەرچاوەش باس لەوە دەکەن لە یانەی بارسێلۆنا هیوادارە جارێکی دیکە گۆڵکاری مێژوویی خۆی بگەڕێنێتەوە ریزەکانی، دوای دوو ساڵ لە رۆیشتنی لە کامپ نو.