ئەمڕۆ تیروپشکی جامی کەنداوە و دهۆکیش بەشدارە

 

 

ئەمڕۆ ئێوارە کاژێر 19:00 لە دەوحەی پایتەختی قەتەر، رێوڕەسمی راکێشانی تیروپشکی جامی کەنداو بۆ یانەکان رادەکێشرێت و هەشت یانە لە پاڵەوانێتییەکەدا بەشدارن لەنێویاندا یانەی دهۆک.

 

دکتۆر عەبدوڵڵا جەلال، سەرۆکی یانەی دهۆک بۆ ئامادەبوون لە رێوڕەسمی راکێشانی تیروپشکی پاڵەوانێتییەکە چووەتە قەتەر و هاندەرانی یانەکەش بە تامەزرۆییەکی زۆرەوە چاوەڕێی ئەنجامی تیروپشکەکە و هەڵوێستی یانەکەیان دەکەن لە پاڵەوانێتییەکەدا.

 

یانە بەشدارەکانی پاڵەوانێتی جامی کەنداوی عەرەبی ئەمانەن؛ دهۆک، ئیتیفاقی سعودی، عەرەبی قەتەری، نەسڕی ئیماراتی، رەفاعی بەحرەینی، قادسییەی کوێتی، ئەهلی سەنعای یەمەنی و زەفاری عومانی.

 

یانە بەشدارەکانی جامی کەنداو بۆ یانەکان بەسەر دوو کۆمەڵەدا دابەشدەکرێن، لە هەر کۆمەڵەیەک چوار یانە و دوو یانەی پێشەنگی هەر کۆمەڵەیەک دەگەنە قۆناخی پێشکۆتایی پاڵەوانێتییەکە.

 

یارییەکانی پاڵەوانێتییەکە لە 23-10-2024 بەردەوام دەبن، رۆژی 15-4-2025 یاریی کۆتایی رکابەرییەکە ئەنجامدەدرێت.

 

دوای 9 ساڵ وەستان، ئەمساڵ جارێکی دیکە رکابەرییەکانی پاڵەوانێتییەکە ئەنجامدەدرێن و خەڵاتی دارایی گەورە بۆ براوەکانی پاڵەوانێتییەکە تەرخانکراون.

 

هەر یانەیەکی بەشدار 300 هەزار دۆلار وەکو پاداشتی گەیشتن بە پاڵەوانێتییەکە وەردەگرێت، پاڵەوانی جامی کەنداو بۆ یانەکان 3 ملیۆن دۆلار وەردەگرێت، خاوەنی پلەی دووەم 1 ملیۆن دۆلاری پێدەدرێت، باشترین یاریزانی پاڵەوانێتییەکە بە 50 هەزار دۆلار خەڵات دەکرێت، باشترین گۆڵپارێز 50 هەزار دۆلار وەردەگرێت و گۆڵکاری پاڵەوانێتییەکەش بەهەمان شێوە 50 هەزار دۆلار خەڵاتی دارایی وەردەگرێت.