بارسێلۆنا دەیەوێت فلیک بکاتە راهێنەری یانەکەی

سامان وڵاتژێری
 
رووداو دیجیتاڵ

یانەی بارسێلۆنا بەدوای راهێنەرێکدا دەگەڕێت بۆ ئەوەی لە شوێنی چاڤی هێرناندێز، بۆ وەرزی داهاتوو راهێنەرایەتی یانەکە بکات، کە زۆر زەحمەتە بۆ وەرزی نوێ چاڤی لەگەڵ یانەکە بەردەوامبێت.
 
لە ماوەی رابردوودا دەنگۆی زۆر لەبارەی ئەگەری رۆیشتن یان مانەوەی چاڤی لە بارسێلۆنا بڵاوکرانەوە، هەرچەند راهێنەرەکە لە کۆنگرەیەکی رۆژنامەڤانیدا لەگەڵ خوان لاپۆرتا، سەرۆکی یانەکە و دیکۆی بەڕێوەبەری وەرزشی بارسێلۆنا دەرکەوت و مانەوەی لە یانەکە دووپاتکردەوە، بەڵام میدیای ئیسپانیا دەڵێت "لاپۆرتا بڕیارییداوە چاڤی لە راهێنەرایەتی بارسێلۆنا دووربخاتەوە."
 
فابریزیۆ رۆمانۆ، رۆژنامەڤانی بەنێوبانگ لەبارەی ئەو پرسەوە نووسیوویەتی "یانەی بارسێلۆنا پەیوەندییەکانی لەگەڵ هانزێ فلیک، راهێنەری پێشووی یانەی بایرن میونشن دەستپێکردووە، بۆ ئەوەی بیکەنە راهێنەری داهاتووی یانەکە."
 
رۆمانۆ دەڵێت "هانزێ فلیک بژاردەی خوان لاپۆرتا، سەرۆکی یانەکەیە، راهێنەرەکەش هیچ گفتوگۆیەکی لەگەڵ یانەی چێڵسی نەکردووە و هەموو بیرکردنەوەی لای ئەوەیە ببێتە راهێنەری یانەی بارسێلۆنا."


بارسێلۆنا لەم وەرزەدا بە دۆخێکی خراپدا تێپەڕی، ئەنجامەکانی وەکو پێویست نەبوون و هیچ دەستکەوتێکیشی نەبوو، چاڤی پێشتر گوتبووی "ریال مەدرید گرێبەست لەگەڵ ئێمباپێ دەکات و ئێمەش لە دۆخێکی خراپداین"، میدیای ئیسپانیا دەڵێت "ئەم قسانەی چاڤی پەیوەندییەکانی لەگەڵ خوان لاپۆرتا تێکداوە و سەرۆکی بارسێلۆنا دەیەوێت چاڤی لە راهێنەرایەتی یانەکە دووربخاتەوە."

 

چاڤی هێرناندێز زیاتر لە جارێک رایگەیاندووە، دەزانم لە دەرەوە و لە میدیاکان چی دەگوترێت، بەڵام من تەنیا گرنگی بە متمانەی سەرۆک و بەڕێوەبەری وەرزشی یانەکە دەدەم کە بۆ من نەگۆڕاون.
 
رۆژی چوارشەممە چەند سەرچاوەیەک رایانگەیاند، هەریەکە لە دیکۆ، بەڕێوەبەری وەرزشی و بۆیان کریکیچ، رێکخەری تۆپی پێ لە یانەکەدا چوونەتە لەندەن بۆ کۆبوونەوە لەگەڵ هانزێ فلیک، لەبارەی پێدانی راهێنەرایەتیی یانەکە بەو راهێنەرە ئەڵمانییە.