ڤیدیۆ؛ هەمووان بۆ ماڵئاواییکردنی کاسێمیرۆ دەگرین

 

 

لە رێوڕەسمی ماڵئاواییکردن لە یاریزانەکەدا کارلۆ ئەنچێلۆتی و چەند یاریزانێکی ریال مەدرید ئامادەبوون، فلۆرێنتینۆ پێرێز، سەرۆکی یانەی ریال مەدرید گوتی " ئەمڕۆ رێز لە سەرکردەیەکی تیپەکە دەگرین کە 5 نازناوی چامپیۆنزلیگی لە ماوەی 8 ساڵدا لەگەڵ یانەکە بردووەتەوە، بیرمە کە یەکەمجار کاسێمیرۆ هاتە کاستیا مەدرید و هەستمدەکرد دەبێتە ئەستێرەیەکی تیپەکە."

 

سەرۆکی ریال مەدرید بە خێزانی یاریزانەکە و کاسیمێرۆی گوت " ئەمڕۆ بۆ ئێوە رۆژێکی تایبەتە، تۆ نموونەی باڵای بۆ پابەندبوون و رێزگرتن لە بەهاکان، هێشتا بیرمە کە پێتگوتم دەمەوێت هەلم پێبدرێت بۆ ئەوەی 5 یاری بکەم، بۆ ئەوەی کوالێتی خۆم پێشانبدەم، بەڵام زیاتر لە 300 یاریت ئەنجامدا."

 

دوای ئەوە کاسێمیرۆ چووە سەر ستەیج و بە چاوی پڕ فرمێسکەوە ماڵئاوایی لە ریال مەدرید کرد و گوتی " ئێوە دەزانن کە من حەزم لەنێوبانگ و سەرنجەکان نایەت، دەمەوێت لە دڵەوە قسەبکەم."

 

دوای ئەم قسانە کاسێمیرۆ بە فلۆرێنتینۆ پێرێزی گوت " بۆ هەمیشە سوپاست دەکەم سەرۆک، بۆ ئەوەی منت هێنایە ئێرە، من زۆر دەستکەوتم لە ریال مەدرید بردووەتەوە، بەڵام گەورەترینیان بەجێهێشتنی ماڵە بۆ ئەوەی بێیتە یاریگە و مەشق بکەیت."

 

ناوەڕاستکارە بەرازیلییەکە گوتی " ناتوانم مۆدریچ و کرووس لەبیربکەم، زۆر ساتی خۆشمان بەیەکەوە بەسەربردووە، سوپاسی هاندەرانی ریال مەدرید دەکەم کە لێرە کاتی زۆر خۆشمان بەسەربرد و هاوکاریی زۆریان کردم."

 

کاسێمیرۆ لە بەرەبەری کۆتایی قسەکانیدا گوتی " دڵنیام بەهۆی ئەو خۆشەویستییەی لێرە پێیان بەخشیم رۆژێک لە رۆژان دەگەڕێمەوە ریال مەدرید، ئەوەی لێرە فێربووم لە داهاتوودا یارمەتیدەرم دەبێت، لە کۆتاییشدا گوتی " بۆ هەمیشە هەلا مەدرید."

 

کاسێمیرۆ دوای بردنەوەی 18 نازناوی جیاواز لەگەڵ ریال مەدرید، بەرامبەر 60 ملیۆن یۆرۆ و 10 ملیۆن یۆرۆ وەک گۆڕانکاری پەیوەندیی بە مانچێستەر یونایتدەوە کرد.