رۆبێرتۆ کارلۆس لەبارەی یاریی پاریس سانجێرمان و ریال مەدرید وەڵامی رووداو دەداتەوە

 

 

رۆبێرتۆ کارلۆس لە کۆنگرە رۆژنامەڤانییەکەدا گوتی " هەڵسوکەوتی خەڵکی هەولێر زۆر گونجاوە و سەرسامی کردم، دڵخۆشم بەوەی کە لێرەم، کەلتوری جیاواز و خەڵکی جیاواز ببیننم."

 

رۆبێرتۆ کارلۆس لە پرسیارێکی تۆڕی میدیایی رووداودا وەک باڵیۆزی یانەی ریال مەدرید، چ زانیارییەکی لەبارەی هەوڵەکانی ریال مەدرید بۆ گرێبەستکردن لەگەڵ ئێمباپێ هەیە؟ ئەو یاریزانەی پێشووی ریال مەدرید گوتی  " ئێمباپێ هێشتا گرێبەستی لەگەڵ پاریس سانجێرمان هەیە، بۆیە ناتوانم لەم بارەیەوە قسەبکەم." 

 

لەبارەی یارییەکەی بەرامبەر پاریس سانجێرمانیش لە قۆناخی 16ـی چامپیۆنزلیگ کارلۆس بە رووداوی گوت " یارییەکە بەڕاستی یارییەکی گەورە دەبێت، بۆیە تەماشای بکەن و چێژی لێ ببینن، بەڵام ئەو مێژوویەی ریال مەدرید هەیەتی، وادەکات بەرپرسیارەتییەکەی زیاتر بێت."

 

کارلۆس لەبارەی تۆپی پێی ئاسیاوە قسەیکرد و گوتی "  تۆپی پێی ئاسیا لە گەشەسەندایە، ئاستی تیم و یاریزانەکان باشتر بوون و دڵنیام بەرەو پێشتر دەچێت ئەگەر گرنگی بە گەشەپێدانی لاوەکان بدەن."

 

لەلایەن خۆیەوە پاتریک کلۆیڤێرت، ئەستێرەی پێشووی هۆڵەندا بە رۆژنامەڤانانی گوت "  قورسە باسی وڵاتێک و شوێنێک بکەین کە پێشتر نەماندیوە، بێگومان وڵاتێکی جوانە، لە ھەمووی گرنگتر ئەوەیە کە خەڵکەکەی زۆر باش و چالاکن."

 

کلۆیڤێرت باس لە رۆیشتنی لیۆنێل مێسی لە بارسێلۆنا و بارودۆخی یانەی بارسێلۆنا دەکات و دەڵێت " پێموایە لەدوای رۆیشتنی مێسی بارسێلۆنا پێویستی بە رێکخستنەوە ھەبوو، بە ستایلی جیاواز بەڵام بەھەمان سیستمی بارسێلۆنا، کە چاڤی ھات شتەکانی رێکخستەوە و ئێستا لەسەر رێگەی راستە، بەتایبەت بینیمان چ ئاستێکیان ھەبوو بەرامبەر ڤالێنسیا، ئێمە دەبێت ئەوە بزانین کە چاڤی پێویستی بە کات ھەیە.

 

هەریەکە لە رۆبێرتۆ کارلۆس، ئەستێرەی پێشووی تۆپی پێی بەرازیل و یانەی ریال مەدرید، پاتریک کلۆیڤێرت، ئەستێرەی پێشووی هۆڵەندا و یانەی بارسێلۆنا گەیشتنە هەولێر.

 

بەرەبەیانی ئەمڕۆ هەردوو یاریزانەکە لە رێگەی فرۆکەخانەی نێودەوڵەتی هەولێرەوە، بۆ یەکەمجار گەیشتنە باشووری کوردستان و لەلایەن ئومێد خۆشناو، پارێزگاری هەولێر و نەبەز عەبدولحەمید، قایمقامی هەولێرەوە پێشوازیان لێکرا.

 

هاتنی کارلۆس و کلۆیڤێرت، لەسەر ئەرکی کۆمپانیای کۆڕەک تیلکۆمە و ئامانج لێی بەشداریکردنە لە پڕۆژەی کاپتن کۆڕەک، کە لەو چوارچێوەیەدا یارییەکی دۆستانەش لە یاریگەی فرانسۆ هەریری ئەنجامدەدەن.